قایمقامیەتی هەولێر: جیهان هاشم خاوەنی ئارایشتگاکە نییە و تەنیا ریکلام دەکات

 

 

لە روونکردنەوەکەدا ناوی ئارایشتگاکە براوە کە لە شاری هەولێرە، ئاماژە بەوەش کراوە، ئەو ئارایشتگایە هاوشێوەی شوێنەکانی دیکە داخراوە و سزای پێبژاردنی بە بڕی یەک ملیۆن دینار بۆ کراوە.

 

قایمقامیەتی هەولێر دەشڵیت، هەر شوێنێک کە دایدەخەن بەپێی بەیانی ژمارە 52ی ساڵی 2020ی وەزارەتی ناوخۆیە کە لە 24ی تشرینی یەکەمی 2020 دەرچووە و مامەڵە لەگەڵ سەرجەم ئەو شوێنانە دەکرێت کەوا دەبنە ھۆی دروستبوونی قەرەباڵخی و بەرکەوتنی زیاتری ھاووڵاتییان.

 

ئەو ئارایشتگایەش کە قایمقامیەت لە روونکردنەوەکە ناوی بردووە، "بەڵێننامەی لێ وەرگیراوە پابەندی سەرجەم رێنماییەکان بێت"، هەروەها دەشڵێت "بۆ زانیاریی زیاتر ئەو ئارایشتگایە ھی کەسێکە کە ناوی لە گرێبەستی ھاوپێچ و پسوولەی سزادان ھاتووە، ئەو کەسەی لە گرتە ڤیدیۆکەیەوە دەرکەوتووە، تەنها بۆ کاری رێکلام لەو شوێنە بووە".

 

روونکردنەوەکەش دوای بڵاوبوونەوەی ڤیدیۆیەکە کە جیهان هاشم بڵاویکردووەتەوە و بە بینەرانی دەڵێت، "با بزانین ئارایشتگاکە داخراوە یاخود نا؟" دواتریش دەچێتە نێو ئارایشتگاکە، ئەمەش دوای ئەوەی ئەو ئارایشتگایە بەهۆی سەرپێچیی رێنماییەکانی رووبەڕووبوونەوەی کۆرۆنا، لەلایەن قایمقامیەتەوە بڕیاری داخستنی بۆ دەرکرابوو.