شێوەکارێک وێنەی کەسایەتییەکانی کوردستان لەسەر دیوارەکانی بانە دەکێشێت

 

 

لە یەکێک لە وێنەکاندا، وێنەی چوار کەسایەتیی ناسراوی کورد کە هەرکامیان لە پارچەیەکی کوردستانن، پێکەوە کێشراوە کە ئەوانیش هەژار موکریانی، شێرکۆ بێکەس، جوان حاجۆ و یەڵماز گونەین.

 

هەروەها لە تابلۆیەکی دیکەدا وێنەی هونەرمەندان حەسەن زیرەک و عەباس کەمەندی کێشراوە.

 

وێنەکان لەلایەن ئارام مەجیدزادە، شێوەکاری خەڵکی بانە کێشراون. ئەو هونەرمەندە تەمەن 39 ساڵانە، 15 ساڵە کاری کێشانەوەی وێنە لەسەر دیوار دەکات و وێنەی کەسایەتییە ئەدەبی و هونەرییەکانی کوردستان بێ بەرامبەر و لەسەر تێچووی خۆی دەکێشێت.

 

 

وێنەکان سەرنجی دانیشتووانی شاری بانە و گەشتیارانیان راکێشاوە و بە گوتەی ئەو دووکاندارانەی شوێنی کارکردنیان لە نزیک وێنەکانە، رۆژانە خەڵکێکی زۆر وێنە لەگەڵ وێنەی ئەو کەسایەتییانە دەگرن.

 

ئارام مەجیدزادە سێ مانگە دەستی بە کێشانی ئەو وێنانە کردووە و بڕیارە لە چەندین شوێنی دیکەی نێو شاری بانە وێنەی هونەرمەندان عەلی مەردان، محەممەد ماملێ و مەزهەر خالەقی بکێشێت. هەروەها پلانی داناوە وێنەی کەسایەتییە ئەدەبییەکانی شاری بانە وەکو د. ئیبراهیم یونسی، وەرگێڕی ناسراوی کورد و هەروەها عەتا نەهایی، نووسەر بکێشێت.