رووداو دیجیتاڵ
دوای نمایشکردنی فیلمی بەڕازیلییە شینەکە لە سینەما، ماڵباتێک سکاڵای یاسایی لەسەر ستافەکەی تۆمار دەکەن و دەڵێن: کەسایەتیی کوڕێکی ئێمەیان شێواندووە و بە بەدکار و بکوژ نیشانیان داوە.
دەرهێنەرەکە ئەو قسانە رەتدەکاتەوە و دەڵێت: هیچ ناوێک لە فیلمەکەدا نەهاتووە و "باشترە ئەو ماڵباتە بێن فیلمەکە ببینن."
فیلمی بەڕازیلییە شینەکە، باسی ژیان لە ساڵانی نەوەدەکان دەکات لە شاری هەولێر، دەرهێنەرەکەی دەڵێ: لە چەند چیرۆکێکی راستەقینەوە وەرگیراوە.
بەگوتەی کەسوکارەکەی، پاڵەوانی سەرەکیی فیلمەکە، کەسێکە بەناوی تەحسین موحسین مەولوود، کە بە تەحۆی بەستەپیازە ناسراو بووە. "تەحۆ کورتکراوەی تەحسینە و بەستەپیازەش گەڕەکێکە لە هەولێر."
موخلیس، برای تەحۆی بەستەپیازەیە، قسەی بۆ تۆڕی میدیایی رووداو کرد و گوتی: "لە فیلمەکەدا، تەحۆ بە کەسێکی دز و بکوژ نیشاندراوە، لەکاتێکدا براکەی من کەسێکی بەغیرەت بووە و لەسەر مافی هەژاران بەردەوام شەڕی کردووە."
موخلیس دەڵێت "ئەو کارانەی لە فیلمەکەدا نیشاندراون، دوورن لە رەوشتی براکەی منەوە، هەروەها ناوی خێزان و دایک و باوکیشم هاتووە، بۆیە سکاڵای یاساییمان لەسەر دەرهێنەر و ستافی فیلمەکە تۆمار کرد."
تەحسین موحسین یان تەحۆی بەستەپیازە، لە ساڵی 1973 لەدایکبووە، بە گوتەی براکەی لە ساڵی 1995 لە هەولێر گولـلەباران کراوە و کوژراوە.
محەممەد شێروانی، دەرهێنەری فیلمەکەیە، لەبارەی سکاڵاکەی ماڵباتی تەحۆی بەستەپیازە قسەی بۆ رووداو کرد و گوتی: "فیلمەکە چیرۆکێکە کە خۆمان دروستمان کردووە، بەڕازیلییەکەی ئەوان سوورە، ئێمە شینمان هەڵبژاردووە و هیچ پەیوەندییەکی بەو بنەماڵەوە نییە."
بەڕازیلییە شینەکە، فیلمێکی ئەکشن و تاوانکارییە و باسی ژیانی هەولێر دەکات لە ساڵانی نەوەدەکانی سەدەی رابردوو.
محەممەد شێروانی دەڵێت "لەنێو فیلمەکەدا، ناوی تەحۆ و تەحسین نەهاتووە، بەهیچ جۆرێک هیچ ناوێک نەهاتووە، با بنەماڵەی تەحۆ بێن فیلمەکە ببینن ئەوسا بڕیار بدەن، رێزمان بۆ ئەو ماڵباتە هەیە، بەڵام ئەوان چیرۆکەکەیان بەسەر خۆیاندا ساخ کردەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ