رووداو دیجیتاڵ
لە ساڵی 2023ـدا قەبارەی کورتهێنانی بازرگانیی تورکیا بۆ نزیکەی 106 ملیار دۆلار کەمبووەتەوە، بەڵام لە کۆتا مانگی ساڵدا کورتهێنانەکە نزیکەی 40% کەمبووەتەوە.
وەزارەتی بازرگانیی تورکیا رۆژی چوارشەممە، 31-1-2024 رایگەیاند، لە ساڵی رابردوودا کورتهێنانی بازرگانیی وڵاتەکە 3.2% کەمبووەتەوە بەراورد بە ساڵی 2022.
بەپێی وەزارەتەکە، لە ساڵی 2023ـدا کورتهێنانی بازرگانیی تورکیا 105 ملیار و 990 ملیۆن دۆلار بووە، لەکاتێکدا لە ساڵی 2022ـدا ئەو بڕە 109 ملیار و 500 ملیۆن دۆلار بووە.
وەزارەتی بازرگانیی تورکیا باسی لەوەشکردووە، لە ساڵی 2023ـدا، تورکیا بە بەهای 255 ملیار و 780 ملیۆن دۆلار کاڵای هەناردە کردووە، لە بەرامبەریشدا بە بەهای 361 ملیار و 770 ملیۆن دۆلار کاڵای هاوردە کردووە.
بەو پێیە، لە ساڵی 2023ـدا هەناردەی کاڵا لە تورکیاوە 0.6% زیادبووە و هاوردەی کاڵاش 0.5% کەمبووەتەوە.
وەکو تورکیا دەڵێت، لە ساڵی 2023ـدا، زۆرترین کاڵای هەناردەکراوی تورکیا بۆ ئەڵمانیا بووە بە بەهای 21 ملیار و 90 ملیۆن دۆلار و، زۆرترین کاڵاشی لە رووسیاوە هاوردە کردووە بە بەهای 45 ملیار و 600 ملیۆن دۆلار.
هاوکات ناوەندیی ئاماری تورکیا دەڵێت، لە کۆتا مانگی 2023ـدا کورتهێنانی بازرگانیی تورکیا 37.8% کەمبووەتەوە بەراورد بە کانوونی یەکەمی 2022.
لە کانوونی یەکەمی 2023ـدا بەراورد بە هەمان مانگی 2022، وەکو ناوەندەکە دەڵێت، هەناردەی کاڵا لە تورکیاوە بۆ وڵاتان 0.4% زیادبووە و گەیشتووەتە 23 ملیار دۆلار. لە بەرامبەریشدا، هاوردەی کاڵا لە وڵاتانی دەرەوە 11% کەمبووەتەوە و بە بەهای 29 ملیار دۆلار کاڵا لە وڵاتانەوە هاوردە کراوە.
بەو پێیە، لەو مانگەدا بازرگانیی تورکیا بە بڕی شەش ملیار و 40 ملیۆن دۆلار کورتهێنانی هەبووە.
سەرەڕای زیادکردنی سوودی بانکی لەلایەن بانکی ناوەندیی تورکیاوە بۆ 45%، بەڵام دابەزینی نرخی لیرە بەردەوامە و یەک دۆلار بە 35.5 لیرەی تورکییە.
کورتهێنانی بازرگانیی تورکیا هۆکاری سەرەکیی دابەزینی بەردەوامی نرخی لیرەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ