رووداو دیجیتاڵ
بەگوێرەی داتاکانی دەستەی ئاماری تورکیا، لە چارەکی کۆتایی ساڵی 2023دا ژمارەی بێکاران لە تورکیا 137هەزار کەس کەمیکردووە و گەیشتووەتە سێ ملیۆن و 70 هەزار کەس.
دەستەی ئاماری تورکیا ئەمڕۆ دووشەممە داتاکانی پەیوەست بە بێکاری لە مانگەکانی 10، 11 و 12ـی 2023دا بڵاوکردەوە.
بەگوێرەی داتاکان، ژمارەی بێکاران لە ماوەی ئەو سێ مانگەدا بەراورد بە هەمان مانگەکانی ساڵی پێشتر، 137 هەزار کەس کەمتر بووە و بۆ سێ ملیۆن و 70 هەزار کەس کەمیکردووە، هەروەها رێژەی بێکاری 0.4٪ کەمیکردووە و بۆ 8.8٪ دابەزیوە.
هەر لەو وادەیەدا بێکاری لە نێو گەنجاندا کەمیکردووە. رێژەی بێکاریی ئەو کەسانەی تەمەنیان لە نێوان 15 بۆ 24 ساڵدایە بە بەراورد بە هەمان مانگەکانی ساڵی 2022 بە رێژەی 1٪ کەمیکردووە و بووەتە 15.9٪.
لە تورکیا و باکووری کوردستان بەراورد بە چارەکی سێیەم کە مانگەکانی (تەمموز - ئاب و ئەیلول)ـی 2023 دەگرێتەوە، لە چارەکی چوارەم و کۆتایی ساڵدا 195 هەزار کەس هەلی کاریان بۆ رەخساوە و بە گشتی بۆ 31 ملیۆن و 867 هەزار کەس هەلی کاریان بۆ دەستەبەرکراوە.
ئاماری بێکاریی دەستەی ئاماری تورکیا بەپێی ئەو کەسانە هەژمار دەکرێت کە بە فەرمی داواکارییان بۆ دەستەبەرکردنی کار پێشکەش کردووە و کاریان بۆ دابین نەکراوە.
ئەو کەسانەی کە بە فەرمی داواکارییان پێشکەش نەکردووە، لە ئامارەکانی ئەو دامەزراوەیە تۆمار ناکرێن. دامەزراوە سەربەخۆکان گومانیان لە ئامارەکانی دەستەی ئاماری تورکیا هەیە و دەڵێن، "ئەو ژمارانە راست نین" و بەگومانن لەوەی ژمارەکە لەوە زیاتر بێت کە دەستەی ئامار رایدەگەیێنێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ