رووداو دیجیتاڵ
نرخی بیتکۆین لە ماوەی تەنیا کاژێرێکدا زیاتر لە هەزار دۆلار دابەزی، ئەوەش بەهۆی دابەزینی بەهای پشکەکانی بانکێکی تایبەت بە دراوە دیجیتاڵییەکان و مەترسیی هەرەسهێنانی.
رۆژی هەینی، 03-03-2023، نرخی بیتکۆین لە ماوەی تەنیا کاژێرێکدا زیاتر لە 5٪ـی نرخەکەی لەدەستدا و لە 23 هەزار و 500 دۆلارەوە بۆ 22 هەزار و 240 دۆلار دابەزی، بەوەش زیاتر لە هەزار و 200 دۆلاری نرخەکەی لەدەستدا، ئەوەش بەهۆی ناڕوونییەکان لەبارەی مەترسیی هەرەسهێنانی بانکی سلڤەرگەیتەوە.
بەهۆی دابەزینەکەی ئەمڕۆوە، بەهای بازاڕی دراوە بیتکۆین 22 ملیار دۆلار دابەزی و گەیشتە 430.9 ملیار دۆلار.
مارکۆس تایلین، سەرۆکی بەشی توێژینەوە لە سەکۆی ماتریکسپۆرت بۆ دراوە دیجیتاڵییەکان دەڵێت: "دابەزینی نرخی بیتکۆین بەهۆی دابەزینی بەردەوامی پشکەکانی بانکی سلڤەرگەیتەوەیە، چونکە ناڕوونیی زیاتر هەیە لەبارەی مامەڵەکانەوە". دەشڵێت: "جگە لەوە، لەسەر ئاستی سێکتەرەکە نیگەرانیی فراوانتر هەیە لەبارەی هەوڵەکانی رێکخەرانی ئەمریکا بۆ زیاتر پچڕاندنی پەیوەندییەکان لەنێوان کۆمپانیاکانی دراوە دیجیتاڵییەکان بانکە مۆڵەتپێدراوەکان."
رۆژی پێنجشەممە، بەهای پشکەکانی بانکەکە زیاتر لە 55% دابەزی، ئەوەش دوای ئەوەی شەوی چوارشەممە بانکەکە بە کۆمیسیۆنی ئاڵوگۆڕی ئەمریکای راگەیاند، کە ناتوانێت راپۆرتی ساڵانەی خۆی لەکاتی خۆیدا پێشکێشبکات و هەڵسەنگاندن بۆ توانای مانەوەی لە مامەڵەکاندا دەکات.
لەگەڵ دابەزینی پشکەکانی بۆ نزمترین ئاست، زۆربەی کڕیارەکانی دراوە دیجیتاڵییەکانی بانکەکە سەرجەم پەیوەندییەکانیان لەگەڵ بانکەکە پچڕاند، لەوانەش کۆینبەیس، پاکسۆس، گالاکسی دیجیتاڵ و Crypto.com.
سلڤەرگەیت بە کۆمیسیۆنی ئاڵوگۆڕی ئەمریکای راگەیاندووە، خەریکی شیکارییە بۆ هەندێ رێکخستن و پرس و لێکۆڵینەوەکانیشی هەڵپەسێردراون.
بەهای پشکەکانی بانکەکە ئەمساڵ بە رێژەی 67٪ دابەزیون.
دابەزینی بەهای پشکەکانی سلڤەرگەیت لەکاتێکدایە، بانکەکە رایگەیاندووە، لە چارەکی چوارەمی ساڵی رابردوودا و بەهۆی ترسی وەبەرهێنەر و بازرگانان لە ئەنجامی هەرەسهێنانی سەکۆی FTXـەوە، 1 ملیار دۆلار زیانی پێگەیشتووە.
بەپێچەوانەی FTX و سەکۆیە دیجیتاڵییەکانی دیکەوە کە ساڵی رابردوودا مایەپووچ بوون، سلڤەرگەیت بانکێکی دانپێدانراوی فیدراڵی و دەستەبەرکراوە و وەک دەروازەیەک لە ئاڵوگۆڕەکانی سێکتەری دراوە دیجیتاڵییەکاندا مامەڵەی کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ