رووداو دیجیتاڵ
نرخی نەوت ئەمڕۆ بەڕێژەیەکی کەم دابەزی، دوای ئەوەی رۆژی رابردوو بەڕێژەی 2٪ بەرزبوونەوەی بەخۆیەوە بینیبوو.
لە دوای کردنەوەی بازاڕەکانی ئاسیا، ئەمڕۆ (سێشەممە) نرخی نەوتی برێنتی دەریای باکوور 10 سەنت دابەزی و بە 74 دۆلار و 67 سەنت مامەڵەی پێوەکرا.
نرخی نەوتی سووکی تەکساسی ئەمریکاش 11 سەنتی لەدەستدا و، بە 71 دۆلار و 37 سەنت مامەڵەی پێوەکرا.
بەپێی راپرسییەک، 49٪ـی ئابووریناسان پێشبینیان کردووە نرخی نەوت بەهۆی ئەگەری سستبوونەوەی ئابووریی چین و هیندستان، ئەم ساڵ لەژێر گوشار دەمێنێتەوە.
راپرسییەکە کە لەلایەن رۆیتەرزەوە ئەنجامدراوە، ئاشکرای دەکات؛ پێناسە گومرگییەکانی دۆناڵد ترەمپ سستبوونەوەی ئابووری بە دواوە دێت، ئەوەش خواست بۆ بەکارهێنانی نەوت کەمدەکاتەوە.
سەرەڕای ئەوە، نرخی نەوت کاریگەریی مەترسییە جیۆسیاسییەکانیشی لەسەرە.
دۆناڵد ترەمپ، هەڕەشەی سەپاندنی پێناسی گومرگی زیادەی لەسەر رووسیا و ئێران کردووە، ئەگەر رووسیا رازی نەبێت بە ئاگربەست و ئێرانیش دانوستاندن رەتبکاتەوە.
هەڕەشەکانی ترەمپ لە رووسیا و ئێران رۆژی دووشەممە نرخی نەوتی بەڕێژەی 2٪ بەرزکردەوە.
شرۆڤەکارانی بانکی (UBS)ـی سویسری لەو بارەیەوە لە یاداشتێکدا رایانگەیاند، "هەڕەشەی ترەمپ بۆ سەر رووسیا و ئێران نیگەرانیی دروستکردووە لەسەر کەمبوونەوە یان نەمانی نەوتی ئەو دوو وڵاتە لە بازاڕەکانی جیهاندا."
ترەمپ رایگەیاندووە؛ چەند هەفتەیەک چاوەڕوان دەکات و دەرفەت بە دانوستاندن دەدات لەگەڵ هەردوو وڵات، بەرلەوەی پێناسە زیادەکان بەسەریاندا بسەپێنێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ