Hewlêr (Rûdaw) - Neteweyên Yekbûyî bangî Serokê Amerîkayê Donald Trump kir ku biryara xwe ya cezakirina Dadgeha Navneteweyî ya Tawanan (ICC) rake.
Serokê Amerîkayê Donald Trump ragihand piştî ku dadgehê biryara girtina Serokwezîrê Îsraîlê Benjamin Netanyahu da ceza bi ser Dadgeha Navneteweyî ya Tawanan (ICC) de ferz kirin.
Berdevka Komîseriya Bilind a Mafên Mirovan (OHCHR) Ravina Shamdasaniyê got:
“Dadgeh beşeke bingehîn a pergala mafên mirovan e.
Em ji ber cezayên takekesî yên li dijî dadgehê gelekî dilgiran in û em bang dikin ku ev tedbîr were bipaşxistin.”
Shamdasaniyê diyar kir ku ICCyê li Myanmar, Sûdan, Ukrayna û Filistînê di darizandina tawanên giran de roleke girîng lîstiye û got:
“Serweriya qanûnê ji bo misogerkirina aştî û ewlehiya me ya hevpar girîng e.”
“Gefê li mafê xweparastina demokrasiyan dixwe”
Serokwezîrê Îsraîlê Netanyahu jî ICC wekî “rêxistineke bêrûmet û gendel” bi nav kir û pesnê fermana Trump da û got:
“Dadgeha Navneteweyî ya Tawanan gefê li mafê xweparastina hemû demokrasiyan dixwe.”
Li hêla din, berpirsên Ukraynayê hêvî dikin ku cezayên Trump ên li dijî dadgehê nebin asteng ji bo darizandina tawanbarên Rûsyayê.
Berdevkê Wezareta Karên Derve ya Ukraynayê Georgiy Tykhy ragihand:
“Em hêvî dikin ku ev yek dê bandorê li şiyana dadgehê neke ku edaletê ji bo qurbaniyên êrişa Rûsyayê pêk bîne.”
Li gel zêdebûna nakokiyan, paşeroja ICCyê ne zelal e.
Neteweyên Yekbûyî berdewam ji serokên cîhanê daxwaz dike ku serxwebûna dadgehê ji bo edaletê û berpirsyariyê biparêzin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse