Hewlêr (Rûdaw) - Seroka Odeya Pizîşkan a Amedê Elif Turan, diyar kir ku di encama kampanya tê birêvebirin de rêjeya kesên doza yekem a vaksîn wergirtine gihiştiye ji sedî 63 û rêjeya kesên doza duyem wergirtine bûye ji sedî 41 û zêdebûna wergirtina vaksînê hejmara pêketiyên Coronayê jî kêm kiriye.
Piştî rakirina tedbîrên Coronayê, bi taybetî destpêkirina perwerdehiya rûbirû hejmara pêketiyên Coronayê li Amedê zêde bû û bi armanca rêgirtina vê yekê kampanya vaksîn wergirtinê hat destpêkirin. Li gor amarên dawî rêjeya kesên vaksîn werdigrin her diçe zêde dibe û li bajêr hejmara pêketiyên Coronayê û kesên jiyana xwe ji dest didin jî kêm bûye.
Li gor zanyariyên Odeya Pizîşkan a Amedê ji 6ê Îlona 2021ê ve ligel destpêkirina perwerdeyê û heta niha li zêdeyî 20 polan ji ber pêketiyên Coronayê perwerde hatiye rawestandin û tê gotin ku bi armanca kêmkirina pêketiyan divê hejmara xwendevanên polan were kêmkirin.
Li parêzgeha Amedê ya Bakurê Kurdistanê Koardînasyona Pandemiyê ya Civaka Sîvîl ku hejmareke partiyên sîyasî û rêxistinên civaka sîvîl li xwe digre 28ê Temûza 2021ê kampanya bi navê “Vaksîn wergirtin berpirsiyariyeke civakiye” dabû destpêkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse