Mursel Tonguc Salmanoglu beşdarî bultena Rojava ya Rûdaw TVyê bû
Hewlêr (Rûdaw) - Serokê Şaxa bajarê Hatayê ya Komelaya Mafên Mirov (ÎHD) Mursel Tonguc Salmanoglu a Tirkiyê bi rêya Rûdawê banga xwedî derketinê li malbatên du girtiyên nexweş ên Kurdên ji Rojavayê Kurdistanê dike ku ji sala 2018ê ve li bajarê Efrînê hatine girtin û li girtîgeha Yayladag a Hatayê girtî ne.
Şaxa bajarê Hatayê ya Komelaya Mafên Mirov (ÎHD) a Tirkiyê di raporteke xwe de ragihand ku 12 girtiyên Sûrî yên li girtîgeha Yayladag a wî bajarî ku 2 ji wan Kurdên Rojavayê Kurdistanê ne di girtîgehê rûbirûyî îşkence û binpêkariyan dibin. Hevserokê ÎHDê yê Hatayê Mursel Tonguc Salmanoglu îro 24ê Adara 2022ê derbarê mijarê de beşdarî bultena Rojava ya Rûdaw TVyê bû û behsa rewşa dawî ya wan girtiyan kir.
Salmanoglu ameje bi wê yekê da di sala 2018ê de 12 kesên ku li bajarê Efrîna Rojvayê Kurdistanê ji aliyê Artêşa Azad a Sûriyê ve hatine desteserkirin û bo Cendermeya Tirkiyê hatine radestkirin û got, “Ev 12 kesên hatine destserkirin dibêjin ku ew wê demê rûbirûyî îşkenceyî bûne û li ser vê yekê serî li me dabûn. Me heta niha çendîn car rapor derbarê wan de amade kirine û hevdîtin ligel wan kirine. Di hevdîtinan de wan digotin ku ew ji Aliyê Artêşa Azad a Sûriyê ve rûbirûyî îşkenceyên cuda bûne û cîgare li ser laşê wan hatine vemirandin. Girtiyan digotin ku navê fermandarê Artêşa Azad ê Sûriyê ku tûndûtîjî li wan girtina kiriye Ebû Seîd e. Girtiyan digotin ku fermandarê navborî piştî ku ew bo Tirkiyê jî hatine radestkirin, hatiye Tirkiyê û îşkence li wan kirine.”
Mursel Tonguc Salmanoglu diyar kir ku dozên beşek ji wan girtiyan ji aliyê parêzerên Komelaya Mafên Mirov ve tên birêvebirin û dozên beşek ji wan jî ji aliyê parêzerên baroyan ve tên birêvebirin û got, “Piraniya wan bi tohmeta endamtiya rêxistinê hatine girtin û proseya yasayî ya derbarê wan de gelek bi giranî birêvediçe. Gelek ji wan bi cezayê 3 caran hetaheta yê girtîgehê tên darizandin. Beşek ji wan bi kuştina 2 leşkerên Tirkiyê tên tohmetbarkirin. ”
Hevserokê Komelaya Mafên Mirov a Hatayê behsa du girtiyên Kurdên Rojavayê Kurdistanê jî kir ku rûbirûyî îşkenceya giran a Artêşa Azad a Sûriyê bûne û nexweşên giran in. Salmanoglu bi rêya Rûdawê bang li malbatên wan girtiyan kir ku xwedî li wan derbikevin û got : “Ez dixwazim ji vir bi rêya xwe bigehînim malbatên van mirovan. Malbat bi vî awayî dê bikarin piştgiriya hiqûqî û aborî bidin van kesan. Ji ber wê yekê ez dê navên wan bibêjim. Yê yekem Mihemed Mehmûd Derwîş e. lingê wî bi bivir hatiye jê kirin. 4 gule li laşê wî hatine dayîn. yê din jî navê wî Elî Seyfettîn Tahar e.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse