Hewlêr (Rûdaw) - Rêveberê Kompanya Lêkolînê ya Metropollê Ozer Sencar ragihand, eger Partiya Demokratîk a Gelan (HDP) ji bo serokkomariyê berbijêr nîşan nede, dê hilbijartin di gera yekem de bi dawî bibe.
Ji hilbijartinên serokkomarî û parlamenteriyê yên 14ê Gulanê re 55 roj man. Kompanyayên rapirsiyê jî li ser rapirsiyan dikin û ji raya giştî re eşkere dikin.
Heta niha Recep Tayyip Erdogan, Kemal Kiliçdaroglu, Muharrem Înce, Sinan Ogan, Fatih Erbakan, Ahmet Ozal û Dogu Perinçek berbijêriya xwe ya bo serokkomariyê ragihandine. HDPê jî heta niha biryar nedaye û tê çaverêkirin roja Çarşemê 22ê Adarê biryara xwe eşkere bike. Eger heye HDP berbijêr nîşan nede û piştgiriya Kemal Kiliçdaroglu bike.
Ozer Sencar got: “Li gor lêkolînan ji bo ku hilbijartin di gera yekem de bi dawî bibe, divê HDP berbijêr nîşan nede û Serokê Partiya Memleket Muharrem Înce jî nebe berbijêr. Dengê Partiya Memleket di meha Çileyê de ji hezarî 5 bû. Meha Sibatê gihişte %2.7 û di meha Adarê de jî gihişte %3.5an.”
Sencar dibêje, eger berbijêr zêde bin bi egereke mezin hilbijartin bo gera duyem dimînin.
Sencar got: “Eger Kemal Kiliçdaroglu û CHP, Muharrem Înce qani bikin dê ev di berjewendiya Hevpeymaniya Millet de be. Eger na hilbijartina ku Sinan Ogan û Muharrem Înce berbijêr bin û HDP jî berbijêr nîşan bide di gera yekem de bi dawî nabe. Eger HDP berbijêr nîşan nede û berbijêriya yên din berdewam be, dîsan jî dibe ku di gera yekem de bi dawî nebe.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse