Hewlêr (Rûdaw) - Li Stenbolê û 8 bajarên din di operasyona li dijî Kongreya Demokratîk a Gelan (HDK) de 52 kes hatin desteserkirin.
Li gorî medyaya fermî ya Tirkiyeyê, Serdozgeriya Komarê ya Stenbolê, bi hinceta ku “baskekî PKKê ye” derbarê HDKyê dest bi lêpirsînê kir û biryara desteserkirina 60 kesan da.
Li 9 bajaran operasyon hat kirin
Polîsan îro sibehê li Stenbolê û 8 bajarên din dest bi operasyonê kir û 52 kes bi hinceta ku "endamên HDKyê ne" hatin desteserkirin.
Di nav kesên desteserkirî de gelek endamên partî û saziyên çepgir ên Tirkiyeyê, rojnamger, hunermend û kesayetiyên naskirî hene.
Partiya Kedê ragihand ku Seroka Şaxa Stenbolê ya Partiya Kedê Sema Barbaros û hinek rêvebir û endamên wan hatine desteserkirin.
Partiya Kedê da zanîn ku serokê berê yê Partiya Kedê Ercument Akdenîz jî hatiye desteserkirin.
Komeleya Rojnamegeran a Dicle Firatê jî ragihand ku rojnameger Elîf Akgul û Yildiz Tar di çarçoveya operasyonê de hatine desteserkirin.
Partiya Çep a Kesk (YSP) jî bi daxuyaniyekê da zanîn ku polîsan bi ser mala endamê rêveberiya YSPyê Nacî Sonmez de girtiye û polîsan ew desteser kiriye.
Partiya Jinûveavakirinê ya Sosyalîst (SYKP) jî di daxuyaniya xwe de got:
"Rêhavalê me yê endamê Rêveberiya DEM Partiyê Mehmet Saltoglu, endamên Meclisa Partiyê ya SYKPyê Halît Elçî û Ahmet Saymadi demjimêrên sibehê li malên xwe hatin desteserkirin.”
Pinar Aydinlar jî hat desteserkirin
Her wiha hunermend Pinar Aydinlar û Serokê Partiya Karkerên Sosyalîst a Şoreşger (DSÎP) Şenol Karakaş û hinek kesên navên wan nehatine zanîn jî hatine desteserkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse