Hewlêr (Rûdaw) - Komeleya Rojnamegeran a Dicle Firatê (DFG) ragihand ku li Tirkiye û Bakurê Kurdistanê meha îlonê 12 rojnameger hatin desteserkirin û 4 jê hatin girtin.
Komeleya Rojnamegeran a Dicle Firatê, rapora meha Îlona 2023yan a binpêkirinên li hemberî rojnamegeran eşkere kir.
Li gorî raporê, meha îlonê li 7 rojnamegeran 5 sal û 9 meh û 15 roj cezaya girtîgehê hatiye birîn.
Di raporê de hatiye destnîşankirin ku meha îlonê 12 rojnameger hatine desteserkirin û 4 jê hatine girtin.
Herwiha 164 parvekirinên medyaya civakî û 268 nûçe hatine astengkirin û 11 weşan hatine qedexekirin.
Li gorî heman raporê danûstandina xirab li hemberî 3 rojnamegeran hatiye kirin, di 11 bûyeran de şopandina nûçeyan a rojnamegeran hatiye astengkirin.
Di heman demê de derbarê 6 rojnamegeran lêpirsîn hatiye destpêkirin.
Li gorî raporê, tevlî Hevseroka DFGyê Dicle Muftuogluyê niha li Tirkiye û Bakurê Kurdistanê 63 rojnameger di girtîgehê de ne.
"Berxwedaneke pêwîst nîne"
DFGyê di rapora xwe de got:
“Li derve ji bo veşartina rastiyan zext û zordariya li ser rojnamegeran berdewam e. Li girtîgehan jî binpêkirinên zêde li hemberî rojnamegeran tên kirin lê li dijî zextan mixabin berxwedaneke pêwîst nîne.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse