Hewlêr (Rûdaw) - Li Rojavayê Kurdistanê û bakur û rojhilatê Sûriyeyê ji bo sala xwendinê ya 2024-2025an amadehî tên kirin.
Desteya Perwerde û Fêrkirinê ya Rêveberiya Xweser ragihand ku sala xwendinê ya 2024-2025an dê 1ê Îlona 2024an dest pê bike û 15ê Gulana 2025an biqede.
Nêzîkî 900 hezar xwendekarî dê berê xwe bidin zêdetir jî 4 hezar û 200 dibistanî.
Heman demê zêdetirî 44 hezar mamosteyan jî dê îsal waneyan bidin.
Reqa jî yek ji wan bajaran e ku Rêveberiya Xweser amadehiyên sala nû ya perwerdeyê li wan dike.
“Me 3 dibistanên nû ava kirine”
Hevserokê Saziya Perwerde û Fêrkirinê ya Reqa Mihemed el-Elî wiha behsa xebat û amadehiyan kir:
“Destpêka sala xwendinê me 3 dibistanên nû ava kirine ku ji bûdceya 2023yan hatine avakirin.
Dibistanên Şehîd Zîlan, Şehîd Ebdullah Hesen û Şehîd Emmar Xelef in.
Herwiha hinek dibistanên din ên li herêmê jî hatine nûjenkirin.”
Mihemed el-Elî diyar kir ji bo amadekirina pirtûkên sîstema xwendinê komîteyên taybet hatine amadekirin.
Perwerdeya mamosteyan
Desteya Perwerde û Fêrkirinê ya Rêveberiya Xweser havînê kursên perwerdeyê dan mamosteyan jî da ku karibin xwendekaran bi awayekî çêtir perwerde bikin.
Hevserokatiya Perwerde û Fêrkirinê ya Reqayê Zelîxe Ebdî li ser kursên ku mamoste dibînin wiha axivî:
“Li ser daxwaza hemû komîte û desteyan roja şemiyê bû roja perwerdekirina mamosteyên kantonên Rêveberiya Xweser da ku fêrî şêwazên dayîn û gihandina sîstema xwendinê bibin.
Pirsa rahênan û perwerdekirina mamosteyan bi dirêjahiya salên borî her berdewam dike.
Divê mamoste rojên şemiyan ên havînê fêrî sîstem û mekanîzmayên nû yên perwerdeyê bibin da ku karibin bi awayekî baş zanyariyan bigihînin xwendekaran.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse