Wêne: Rûdaw
Hewlêr (Rûdaw) - Li parêzgeha Amedê ya Bakurê Kurdistanê her kes li benda bangawaziya Rêberê PKKyê Abdullah Ocalan e.
Welatî bi hêvî ne ku şer bi dawî bibe û dibêjin bila êdî kes siyaseta şer neke.
Welatî Mustafa Kemal Sana got, "Ev derfeteke dawî ye hem ji bo dewletê û hem jî bo Kurdan.
Li Tirkiyeyê divê Kurd û Tirk wek hev bijîn û şer bidawî bibe, fêda şer bo kesekî nîne. Li ser mirina kesekî êdî bila siyaset neyê kirin."
Saziyên civakî jî ji rewşê razî ne ku hewildana aştiyê tê dayîn.
Alîkarê Serokê Navenda Lêkolînên Civakî ya Dîcleyê Sedat Yurtdaş diyar kir ew ji pêvajoyê bi hêvî ye û Komara Tirkiyeyê neçar maye ku pirsgirêkên xwe çareser bike.
"Kes nizane dê Ocalan bi giştî çi bibêje"
Alîkarê Serokê Navenda Lêkolînên Civakî a Dîcle Sedat Yurtdaş wiha anê ziman:
"Komara Tirkiyeyê jî fam kiriye ku divê mijar bi awayekî mayînde bê çareserkirin.
Di vê wateyê de ez bi hêvî me. Wê di demeke kurt de bê eşkerekirin. Kes nizane dê Ocalan bi giştî çi bibêje.
Dibe ku hatibe gotin jî, hinekan digot vîdeo hatiye amadekirin û tenê li bendî wextê eşkerekirinê ne."
Yek ji aliyê vê pêvajoya tê gotûbêjkirin DEM Partî ye ku Şandaya Îmraliyê ji parlamenterên wê pêk tê.
Hevseroka Rêxistina DEM Partiyê ya Amedê Gulşen Ozer dibêje ew bi kelecan in ku hêviyek ji bo aştiyê çêbûye.
"Xelk dixwaze bi awayekî azad bijî"
Hevseroka Rêxistina DEM Partî a Amedê Gulşen Ozerê got:
“Xelk dibêje me gelek êş dîtine bila yên piştî me baş bijîn. Me zarokên xwe ji dest dane bila xwîna zarokên kesên din nerije û şer bidawî bibe.
Xelk dixwaze bi awayekî demokratîk û azad bijî. Ji ber dawiya şer nîne. Sed sal jî şer bê kirin dê dawî aştî pêk bê."
Li gel ku hatibû diyarkirin dê banga Rêberê PKKyê Abdullah Ocalan 15ê Sibatê bê kirin lê Şandeya Îmraliyê ya DEM Partiyê di navbera 16 û 17ê Sibata 2025an de dê were Herêma Kurdistanê û li gel serkirdeyên herêmê bicive.
Ji ber vê yekê jî tê pêşbînîkirin ku piştî van hevdîtinan daxuyaniyek bê dayîn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse