Hewlêr (Rûdaw) - Meclîsa Asayişa Herêma Kurdistanê ragihand ku kesê êrîşî merasîma Cejna Ekîtoyê ya li Dihokê kir, “ xwedî bîr û baweriyên terorîstî yên DAIŞê ye."
Li Dihokê îro di şahiya pîrozbahiyên Cejna Ekîtoyê de di êrişeke bi kêrê de kes birîndar bûn.
Encumena Asayîşê diyar kir, Hêzên Rêveberiya Asayîşê ya Dihokê kesê êrişkar ku xelkê Sûriyeyê ye, desteser kir.
Li gorî daxuyaniya Meclîsa Asayişa Herêma Kurdistanê lêkolînên li ser bûyerê berdewam in û piştî bidawîbûna wê, dê encam ji bo welatiyan û raya giştî bêne eşkerekirin.
Her îro, parêzgarê Dihokê Elî Teter got:
“Em bi tundî vî kiryarê nemirovane şermezar dikin, ku tawanbarekî xwestiye bi vî rengî bihevrejiyana li Kurdistanê bi dawî bîne lê ti kes nikare.
Rehên wê di dilê me de çikiyane û em weke çavên xwe wan diparêzin.”
Cejna Ekîtoyê
Ekîto xwedî dîrokeke kevnar e û dîroka wê diçe 5300 sal beriya zayînê.
Cejna Ekîtoyê ku hem sala nû ya gelê Asûrî/Siryanî ye, sembola nûbûna xwezayê û hatina biharê ye.
Ekîto ku di bingehê xwe de festîvaleke olî ye, di heman demê de jiyan û nûbûnê jî temsîl dike.
Her çi qasî di destpêka sedsala 20an de hatibe jibîrkirin jî, Ekîto ji bo parastina nasnameya gelê Asûrî/Siryanî bûye semboleke girîng.
Cejna Ekîtoyê, dikeve roja yekemîn a meha Nîsanê.
Di vê cejnê de wekî nerîtekê salane fêstîval û çalakiyên cur bi cur tên lidarxistin.
Cejna Ekîtoyê 12 rojan didome, ji bilî govend û reqsê, wekî Newroza Kurdan geşt û seyranan jî di nav de heye.
Li Herêma Kurdistanê ji sala 1992yan ve Xirîstiyan vê cejnê pîroz dikin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse