Hewlêr (Rûdaw) – Hunermedê Dêrsimî Mikaîl Aslan "Xelata Rûmetê ya Ahmet Kaya" wergirt.
Mikaîl Alsan got, “Ez xelata xwe diyarî hemû ziman û çandên ku tevî zextan ji bo hebûnê têdikoşin dikim.”
Yekîtiya Xwediyên Karên Muzîkê yên Tirkiyeyê (MESAM) 37emîn salvegera damezrandina xwe bi gala û xelatdayînê pîroz kir.
Merasîma xelatdayînê li Otela Grand Cevahîrê ya Stenbolê hat lidarxistin.
Li merasîmê xelatên “Serkeftin”, “Destkeftina Herî Baş”, “Çapemenî”, “Rûmet” û “Xelata Taybet a Sala 35emîn” hatin dayîn.
MESAMê, li ser navê Aşik Veysel, Îbrahîm Erkal, Ahmet Kaya, Yildirim Gurses, Mahzunî Şerîf, Atilla Ozdemîroglu, Neşet Ertaş û Esîn Engîn xelatên “Rûmetê” dan.
Hunermend Mikaîl Aslan hêjayî Xelata Rûmetê ya Ahmet Kaya û Metîn Kahraman û Kemal Kahraman jî hêjayî Xelata Rûmetê ya Cem Karaca hatin dîtin.
“Ez diyarî ziman û çandên ku di bin zextan de ji bo hebûnê têdikoşin dikim”
Mikaîl Aslan di merasîmê de xelata xwe diyarî wan zimanên ku di bin zextan de têkoşîna hebûnê didin kir û got:
“Dûr, nêzîk ferq nake, li ser dilê me hemûyan şopa tiliyên Ahmet Kaya heye.
Ji bo ku wî rastî anî ziman ew hat mehkûmkirin û ji welatê xwe dûr li sirgûniyê hat veşartin.
Ez li ber wêrekî û felsefeya Ahmet Kaya bejna xwe ditewînim. Ez vê xelatê ji bo ku ti hunermendekî me neyê sirgûnkirin û li sirgûniyê çavên xwe negire distînim.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse