وەزارەتی دەرەوەی ئەمریکا بۆ رووداو: لێخۆشبوونمان بۆ عێراق دەرنەکردووە کە قەرزەکانی رووسیا بداتەوە

 

ماتیۆ میلەر، گوتەبێژی وەزارەتی دەرەوەی ئەمریکا ئەمڕۆ (چوارشەممە، 9ـی ئابی 2023) بە دیار کوردە، بەڕێوەبەری نووسینگەی رووداو لە واشنتن راگەیاند "ئێمە لێخۆشبوونمان بۆ دانەوەی قەرزەکان دەرنەکردووە. ئێمە بەردەوامین لەسەر جێبەجێکردنی هەموو سزاکانمان لەسەر رووسیا. هیچ گۆڕانکارییەک بەسەر سیاسەتی ئێمە بەرامبەر بە کاری کۆمپانیا رووسییەکان نەهاتووە."

 

گوتەبێژی وەزارەتی دەرەوەی ئەمریکا ئاماژەی بەوەشکرد، رووسیا هیچ ئاماژەیەکی بۆ هێوربوونەوەی دۆخی ئۆکراینا نیشان نەداوە و نەیویستووە دەست بە گفتوگۆ بکات بۆ چارەسەرکردنی دۆخەکە، ئەوەش وایکردووە، سزاکانی ئەمریکا لەسەر کۆمپانیا رووسییەکان بەردەوام بن. 

 

میلەر گوتی "رووسیا دابینکارێکی جێمتمانەی وزە نییە و بەردەوام ئەو وڵاتە بییانییەی کە پشت بە سەرچاوەی وزە رووسیا دەبەستن بەکاردەهێنێت بۆ ئەوەی کاریگەری لەسەر ئەو وڵاتانە بە ئاراستەی بەرژەوەندییەکانی کرێملن دروست بکات".

 

لەدوای هێرشی رووسیا بۆ سەر ئۆکراینا، ئەمریکا ژمارەیەک سزای بەسەر رووسیادا سەپاند، کە بەهۆی ئەو سزایانەوە، وڵاتان ناتوانن وەکو پێشوو مامەڵەی بازرگانی لەگەڵ رووسیادا بکەن و پارە بۆ کۆمپانیاکانی رووسیا و بانکەکانی رووسیا بنێرن، ئەمەش گەورەترین کێشەی بۆ حکومەتی عێراق دروستکرد، کە قەرزێکی زۆری ئەو کۆمپانیایانەی لایە.

 

وەبەرهێنانی کۆمپانیا رووسەکان لە عێراق بە نزیکەی 10 ملیار دۆلار دەخەمڵێندرێت، بەشێکی زۆری ئەو کۆمپانیایانە لە کەرتی وزەدا کاردەکەن.

 

حکومەتی عێراق چەندجارێک داوای لە ئەمریکا کردووە، هاوشێوەی ئێران لێخۆشبوون بۆ قەرزەکانی رووسیاش دەربکات، بەتایبەتیش کاتێک لە مانگی شوبات، شاندێکی عێراق بە سەرۆکایەتیی وەزیری دەرەوەی عێراق لە واشنتن لەگەڵ بەرپرسانی ئەمریکا و لە نێویاندا لەگەڵ وەزیری دەرەوەی ئەمریکا کۆبوونەوە.

 

عراق بە بەرپرسانی ئەمریکای راگەیاندووە، ئەم قەرزانە هی پێش هێرشەکانی رووسیان بۆ سەر ئۆکراینا، هاوکات بە نەدانەوەی، قەبارەی قەرزەکان لەسەر عێراق زیاتر دەبن، بۆیەش داوا لە واشتن دەکەن لێخۆشبوون بۆ ئەو قەرزانە دەربکات، بەڵام واشنتن تاوەکو ئێستا بەهەموو شێوەیەک ئەو داوایەی عێراقی رەتکردووەتەوە.

 

ماتیۆ میلەر، گوتەبێژی وەزارەتی دەرەوەی ئەمریکا: پێش هەموو شتێک، نەخێر، ئێمە لێخۆشبوونمان بۆ دانەوەی قەرزەکان دەرنەکردووە. ئێمە بەرەوامین لەسەر جێبەجێکردنی هەموو سزاکانمان لەسەر رووسیا. هیچ گۆڕانکارییەک لەسەر سیاسەتی ئێمە بەرامبەر بە کاری کۆمپانیا رووسییەکان رووینەداوە؛ ئێمە بە تووندی دژی دنەدان و داگیرکارییەکانی رووسیا لە ئۆکراینا دەوەستینەوە، وەک دەزانن کە رووسیا هیچ ئاماژەیەکی بۆ هێورکردنەوەی دۆخەکە نیشان نەداوە و نەیویستووە دەست بە گفتوگۆی جیددی بکات، هەر بۆیە ئێمە بەردەوام دەبین لە جێبەجێکردنی سزاکانمان، لەنێویاندا کەمکردنەوەی ئەو داهاتەی کە [رووسیا] لە کەرتی گاز بەدەستیدەهێنیت، لە کۆتاییدا، ئەوە دەڵێم کە رووسیا دابینکارێکی جێمتمانەی وزە نییە و بەردەوام ئەو وڵاتە بییانییەی کە پشت بە سەرچاوەی وزە رووسیا دەبەستن بەکاردەهێنێت بۆ ئەوەی کاریگەری لەسەر ئەو وڵاتانە بە ئاراستە بەرژەوەندییەکانی کرێملن دروست بکات. قسەی کۆتاییشم ئەوەیە، نەخێر، ئێمە گۆڕانکاریمان لە سزاکاندا نەکردووە. 

 

 

ماتیۆ میلەر، گوتەبێژی وەزارەتی دەرەوەی ئەمریکا: ئێمە بەردەوام دەبین لە جێبەجێکردنی هەموو سزاکان، بەڵام جگە لەوە من لێرە هیچ کردارێکی تایبەت ناخەمەڕوو.