هەڵەیەک روویدا! دووبارە هەوڵبدە
شوێنی هێرشەکە.
رووداو دیجیتاڵ
لە ئەڵمانیا ئۆتۆمبێلێک خۆی بەنێو قەرەباڵخییەکدا کرد. بەهۆی رووداوەکەوە دوو کەس گیانیان لەدەستدا و 11ـی دیکە برینداربوون. پۆلیسی ئەڵمانیا دەڵێت، شۆفێری ئۆتۆمبێلەکە تەمەنی 40 ساڵ بووە.
ئەلێکساندەری ئەڵمانی کە تەمەنی 40 ساڵە، بە ئۆتۆمبێلێکی شین خۆی بە خەڵکدا کێشا و دوو کەسی کوشت. رۆژێکی بەهارەی خەڵکی شاری مانهایم و ئەڵمانیای پڕ کرد لە خەم و پەژارە.
ئولریکە شێفەر، فەرماندەی پۆلیسی مانهایم بە رووداوی گوت: "ئۆتۆمبێلێک لە ناوچەی پیادە خۆی کێشا بە چەند کەسێک دا. سەرەتا وا دانرا کە رووداوی هاتووچۆ بووە، بەڵام زانیاری شایەتحاڵەکان بەخێرایی گومانی ئێمەیان بەهێزتر کرد کە لێخوڕینێکی بە ئەنقەست بووە بە خێراییەکی زۆر لە ناوچەی پیادە، لەوێ بە ئەنقەست بەداخەوە بۆ بریندارکردن یان کوشتنی خەڵک بووە."
سەرەتا میدیای ئەڵمانی رایگەیاند دوو کەس کوژراون و 25 کەسی دیکە بریندارن، بەڵام ئەو ئەفسەرەی پۆلیسە ئاماژە بەوە دەدات، لە رووداوەکە دا "دوو کەس کوژراون و 11 کەس بریندارن کە هەندێکیان برینەکانیان سەختن. ژمارەیەکی زۆر خەڵکی تووشبوومان هەیە کە تازە لەو ناوچەیە بوون و شاهێدی ئەم رووداوەن و ئێستا بەشێکیان لەلایەن ئێمەوە چاودێری دەکرێن و بەشێکیشیان لە شاری مانهایم چارەسەر دەکرێن."
داواکاری گشتی دەڵێت، تاوەکو ئێستا پاڵنەری پشت ئەم رووداوە دیار نییە.
رۆمیۆ شویسلەر، داواکاری گشتیی باڵای مانهایم دەڵێت: "بەگوێرەی ئەنجامەکانی تا ئێستا هەن، هاووڵاتییەکی ئەڵمانی تەمەن 40 ساڵە کە بە تەنیا و بە بێ خێزان لە لودڤیگسهافن دەژیا. تا ئێستا بۆ هیچ کارێک کە شایەنی باسکردن بێت نەچووەتە بەردەم دادگە. بەدڵنیاییەوە لێکۆڵینەوەمان کرد کە ئایا کردارێکی سیاسی هەبووە یان نا. تا ئێستا هیچ بەڵگەیەکمان لەسەر ئەوە نییە."
هاوکات، ئاماژە بەوە دەکات: "ئەو بەڵگانەی تا ئێستا بەدەستمان گەیشتوون لەسەر تاوانبارەکە ئەوە دەردەخەن کە ئەگەری هەیە نەخۆشیی دەروونیی هەبێت. ئەو پێشتر لە رووی تاوانکارییەوە دیار بوو، بەڵام سەرپێچی بچووکی هەبوو و دوایین جار لە فەیسبووک بڵاوکرایەوە یەک گوتاری رق و کینەی نووسیوە. بێگومان ئەمە بابەتی لێکۆڵینەوەکەیە، کە ئایا هەڵوێستێکی راستڕۆی لە پشتەوەیە."
ئەلکساندەر شویەرمان ئەو کەسەیە کە خۆی بە دەمانچەیەکی دەنگی بریندار کردووە و رووداوەکەی مانهایمیشی ئەنجامداوە. بەگوێرەی ئەلبوومی وێنەکانی نێو سۆشیاڵ میدیا، رۆستڕۆیی تووندڕۆیی لەلای هەبووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ