رووداو دیجیتاڵ
کیلیان ئێمباپێ، ئەستێرەی فەرەنسیی یانەی ریال مەدریدی ئیسپانی، لە هەڤپەیڤینێکی نوێدا، کە هێشتا بڵاونەکراوەتەوە، ئەوپەڕی دڵخۆشیی خۆی لە بوونی لە ریزەکانی یانەی شاهانەدا دەربڕی و رایگەیاند "ریال مەدرید کەسایەتییەکی هێندە بەهێزی هەیە کە هیچ یانەیەکی دیکە خاوەنی نییە"، هەروەها دەڵێت "خەونی یاریکردنی بۆ ریال مەدرید بووەتە واقیع".
کیلیان ئێمباپێ لە هەڤپەیڤینێکی نوێدا، کە یەکشەممەی داهاتوو پەخش دەکرێت و یەکەمجارە لە ئیسپانیا هەڤپەیڤینێکی لەو شێوەیەی لەگەڵ دەکرێت، باسی زۆر لە نهێنییەکانی ژیانی تایبەتیی خۆی دەکات.
ئاماژەی بەوەشکرد "پێشتر خەونم بە یاریکردن بۆ یانەی ریال مەدریدەوە دەبینی، دواتر بوو بە ئامانج، ئێستاش بووەتە واقیع".
ئەستێرەی فەرەنسی، لە بەشێکی هەڤپەیڤینەکەدا، دەڵێت "تەنیا ویستم بە پۆشینی درێسی ریال مەدریدەوە لە یاریگای سانتیاگۆ بێرنابیۆ یاری بکەم، ئەو ساتانە لەگەڵ هاندەران بژیم کە ناوی من دەڵێنەوە، گۆڵ تۆماربکەم و دڵخۆش بم".
ئەو زیاتر دەڵێت "من وەک هاندەرێکی زینەدین زیدان دەستمپێکرد لەگەڵ گالاکتیکۆس (ئەو سەردەمەی کە لە ریال مەدرید لە ساڵی 2000 دەستیپێکرد، دوای ئەوەی فلۆرێنتینۆ پێرێز بۆ یەکەمجار بوو بە سەرۆکی یانەی ریال مەدرید و کۆمەڵێک لە سوپەرستارەکانی جیهانی لە یانەی شاهانە کۆکردەوە).
ئێمباپێ هەروەها دەڵێت "پێموایە من کەسێکم لە رووخساری دەموچاومەوە دەتوانن بزانن کە دڵخۆشم یان نا، ئێستا من دڵخۆشم، زۆر دڵخۆشم".
کوڕە فەرەنسییەکە دەشڵێت "دەمەوێت لالیگا و چامپیۆنزلیگ ببەمەوە، هەروەها هەموو ئەو شتانەی کە دەکرێت لەگەڵ ریال مەدرید ببەمەوە".
ئەستێرە فەرەنسییەکە لەو هەڤپەیڤینەدا ئاماژەی بەوەشکردووە، دایک و باوکی بەدرێژایی ساڵان زۆر شتیان پێبەخشیوە و دەڵێت "ئەوان لە گەشتەکەمدا بۆ ئەو شوێنەی ئەمڕۆ لێی دەژیم، رۆڵی سەرکییان هەبووە".
هەروەها کیلیان لەم هەڤپەیڤینەدا باسی لە ژیانی تایبەتی خۆی کردووە و دەڵێت "من پیاوێکی ئاساییم پێش ئەوەی یاریزانی تۆپی پێ بم، کەسێکم ژیانی تایبەتی خۆم دەژیم، رووداوەکان دەبینم، هەندێک شت هەیە کە حەزم لێیانە، هەندێک شت هەیە لێیان پەشیمان دەبمەوە، هەندێک شتیش هەیە تووڕەم دەکەن. لە کۆتاییدا بۆچوونی خۆم دەردەبڕم، هەندێک نەریت و بەها هەن کە بڕوام پێیانە و باوەڕم وایە بۆ من و بۆ جیهان باشن".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ