چاڤی سزادرا

 

 

لە یاریی نێوان ئاتلێتیکۆ مەدرید و بارسێلۆنا، کە تێیدا یانە کەتەلۆنییەکە بە سێ گۆڵی بێبەرامبەر سەرکەوتنی بەدەستهێنا، چاڤی بەهۆی ناڕەزایەتی دەربڕین بەرامبەر چەند بڕیارێکی ناوبژیوانی یارییەکە، کارتی زەردی پێدەدرێت، دواتریش لەسەر ئەو کارەی بەردەوامدەبێت و بەوهۆیەوە ناوبژیوانی یارییەکە کارتی سووری راستەوخۆی پێدەدات و دەریدەکات. 

 

لە ماوەی رابردوودا هەواڵی ئەوە بڵاوبووەوە کە رەنگە چاڤی بۆ سێ یاریی رابگیرێت و نەتوانێت لە یاریی کلاسیکۆ بەرامبەر ریال مەدرید ئامادەبێت، بەڵام لێژنەی لالیگا بڕیاریدا بۆ دوو یاری سڕی بکات و بەمشێوەیە بەرامبەر یانەکانی لاس پاڵماس و کادیز ئامادەنابێت، بەڵام بۆ یاریی کلاسیکۆ دەگەڕێتەوە و سەرپەرشتی یانەکەی دەکات. جگە لە راگیرانی بۆ دوو یاری، چاڤی بەپێبژاردنی 600 یۆرۆ و بارسێلۆنا بە 700 یۆرۆ سزادران.

 

بارسێلۆنا لەم وەرزەدا بە سەرپەرشتی چاڤی نەیتوانی ئاستێکی بەرز پێشکێش بکات و لە ژێر گوشاری میدیاکاندا بڕیاریدا لە کۆتایی وەرز لە بارسێلۆنا بڕوات، بەڵام دوای ئەو بڕیارە دۆخی تیپەکەی گۆڕا و بەمدواییە ئاستێکی باش پێشکێش دەکات، کە لە لالیگادا پلەی دووەمی ریزبەندیی بەدەستهێناوە و لە چامپیۆنزلیگیشدا توانیویەتی بگاتە قۆناخی هەشتی پاڵەوانێتییەکە، کە ئێستا هاندەرانی بارسا دەتوانن هیوایان بە تیپەکەیان بێت و خودی چاڤیش گوتوویەتی "هاندەران و یاریزانانی بارسا ئێستا دەتوانن خەون ببینن".