رووداو دیجیتال
یانەی پاریس سانجێرمان لە هەنگاوێکی گرنگدا بۆ پاراستنی وەرزەکەی لە وشکەساڵی و بێ نازناوی، لەگەڵ یانەی مۆناکۆی رکابەرە دێرینەکەی یاری دەکات، دوای ئەوەی لە فایناڵی جامی فەرەنسا بەیەکدەگەن.
ئەمشەو کاژێر 22:15 لە یاریگەی ستاد دێ فرانس لە دەرەوەی شاری پاریس، یانەی مۆناکۆ کە ئەم وەرزە بە بەهێزی گەڕاوەتەوە و بە سەرکردایەتی نیکۆ کۆڤاچی کرواتی و گۆڵکەری بەتوانا ویسام بن یەدر، رووبەڕووی ئێمباپێ و کوڕانی پۆچێتینۆ دەبنەوە، لەو یارییەی کە نەیمار داسیلڤای بەرازیلی بەهۆی سزادانەوە یاری ناکات.
لەم یارییەدا پرێسنل کێمپامپێی بەرگریەری پاریسیش بەهۆی راگیرانەوە ئامادەی یاریکردن نابێت، لە یانەی مۆناکۆش ستیڤان یۆڤیتیچ و سوفیان دویب یاری ناکەن.
پاریس کە 13 جار بووەتە پاڵەوانی نازناوەکە و مۆناکۆش کە 5 جار ئەم جامەی بەرزکردەوە، هەوڵ بۆ بردنەوەی نازناوی ئەمساڵ دەدەن و دەیانەوێ هاندەرانیان بەم پاڵەوانێتییە دڵخۆش بکەن.
پاریس لەم هەفتەیەدا یاریی لەسەر دوو نازناوی گرنگ دەکات، بە رێژەیەکی کەم هەلی بردنەوەی خولی فەرەنسیی ماوە، بەڵام بۆ ئەم نازناوەیان لەدەستی خۆیدایە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ