سزاکەی بێلینگهام راگەیێنرا

19-02-2025
رێبوار محه‌ممه‌د
نیشانەکردن لالیگا جود بێلینگهام یانەی ریال مەدرید
A+ A-

رووداو دیجیتاڵ

فیدراسیۆنی تۆپی پێی ئیسپانیا، سزای جود بێلینگهامی یاریزانی یانەی ریال مەدریدی راگەیاند کە لە یاریی پێشووی یانەکەی بەرامبەر ئۆسەسۆنا بەکارتی سوور کرابووە دەرەوە.
 
فیدراسیۆنە ئیسپانییەکە ئاشکرایکردووە، بێلینگهام بۆ دوو یاریی لە لالیگا رادەگیرێت و بەوەش لە هەردوو یاریی داهاتووی یانەکەی بەرامبەر جیرۆنا و ریال بێتیس بەشداریی ناکات.
 
هۆکاری ڕاگرتنەکە دەگەڕێتەوە بۆ ناڕەزایی دەربڕینی بێلینگهام بەرامبەر خوان مونیێرا مۆنتێرۆی ناوبژیوان لە کاتی یارییەکەدا.
 
راپۆرتی ناوبژیوانەکە لە دوای یارییەکە دەڵێ، بێلینگهام سووکایەتی پێکردووە، کاتێک پێی گوتووە (فەک ئۆف)، بەڵام ئەو یاریزانە رەتیدەکاتەوە قسەکەی بەمەبەستی سووکایەتی کردبێت و دەڵێ ئەوە قسەیەکی ئاساییە کردوومە.
 
میدیای ئیسپانیا دەڵێن، لەبەرئەوەی ناوبژیوان لە قسەکەی ئەو یاریزانە بەتەواوی تێنەگەیشتووە، هەربۆیە سزاکەی کەمبووە.
 
ریال مەدرید لای خۆیەوە بەنیازە تانە لە بڕیارەکە بدات، بەبیانووی ئەوەی کارتە سوورەکە پاساوی نەبووە و یاریزانی یانەکە هەڵەی نەکردووە.
 
یارییەکەی نێوان ئۆسەسۆنا و ریال مەدرید بەیەکسانبوون 1 - 1 گۆڵ کۆتاییهات و دوای یارییەکە مشتومڕی زۆر لەسەر بڕیارەکانی ناوبژیوان دروستبوو.
 
دوێنێ میدیای ئیسپانیا ژمارەیەک بەڵگەنامەیان لەسەر بزنسی نایاسایی خوان مونیێرا مۆنتێرۆی ناوبژیوان بڵاوکردەوە و هەر دوێنێ، فیدراسیۆنی تۆپی پێی ئیسپانیا، راگرتنی ئەو راهێنەرەی لە بەڕێوەبردنی یارییەکانی گەڕی داهاتووی لالیگا راگەیاند و ئەوەشی ئاشکراکرد، لیکۆڵینەوەی لەگەڵ ئەو ناوبژیوانە لەبارەی بەڵگەنامە بڵاوکراوەکانی میدیاکان دەستپێکردووە.
 

کۆمێنتەکان

وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه‌

کۆمێنتێک دابنێ

داواکراوە
داواکراوە