فابریگاس: دی برۆین وەک کوڕێکی بچووک وایە کە پێڵاوی تازەی کڕیبێت

 

 

دی برۆینی بەلجیکی بە یەکێک لە باشترین ناوەڕاستکارەکانی جیهان دادەنرێت، هەر لەگەڵ بەشداریکردنی لە یەکەم یاری ئەم وەرزەی پرێمەرلیگ، تووشی پێکانێکی قورس بوو و بۆ ماوەی زیاتر لە چوار مانگ دوورکەوتەوە. 

 

دوای چاکبوونەوە لە پێکانەکەی و لە یەکەم دەرکەوتنەوەی لە پرێمەرلیگ، کێڤن لە گێمی دووەمی یارییەکەی بەرامبەر نیوکاسڵ هاتە نێو یاریگە و توانی گۆڵێک و ئاسیستێکی نایاب بکات و سێ خاڵی زێڕینی بۆ یانەکەی بەدەستهێنا، فابریگاس لەو بارەیەوە دەڵێت "کێڤن ئێستا وەک کوڕێکی بچووک وایە کە پێڵاوی تازەی کڕیبێت."

 

ئەستێرەکەی پێشووی ئیسپانیا زیاتر دەڵێت "ئەو بەپەرۆشە و زیندووە. بۆ ماوەی 20 خولەک لە یارییەکەی نیوکاسڵ بەشداری کرد و زۆر بەبرسێتییەوە گەڕایەوە. بەهۆی ئەوەی لە یانەیەکی زۆر باش یاریدەکات، هیچ گوشارێکی لەسەر درووستنابێت و دەتوانێت هەنگاو بە هەنگاو بگەڕێتەوە."

 

دواتر فابریگاس باس لە داهاتوو دەکات کاتێک دی برۆین تەمەنی بەرەو سەرەوە دەچێت و چیدیکە ئەو توانا جەستەییەی ئێستای نامێنێت، ئەو دەڵێت "دەزانم کە کێڤن زۆر سوود لە توانا جەستەییەکەی وەردەگرێت، ئەو تۆپ وەردەگرێت، دەست بە راکردن دەکات و شووتێکی بە‌‌هێز لێدەدات، بەڵام دی برۆین یەکێکە لەو یاریزانانەی دەتوانێت خۆی لەگەڵ گەورەبوونی تەمەنیدا بگونجێنێت کاتێک توانای جەستەیی و خێرایی کەم دەبێتەوە، چونکە ئەو دەتوانێت لە (چەق)ـی ناوەڕاست یاری بکات، لە تەنیشت رۆدری  بۆ نموونە. ئیدی لەوێ دەتوانێت بەردەوامبێت، چونکە ئەوە ئەو کارەیە کە یاریزانە تایبەت و بلیمەتەکان ئەنجامی دەدەن کاتێک تەمەنیان بەرەوسەرەوە دەچێت."