رووداو دیجیتاڵ
سەرەتا ناوازەکەی بارسێلۆنا لە وەرزی ئەمساڵ و بردنەوەی زنجیرەیەک یاریی بەدوای یەکدا و دەرکەوتنی تیپەکە بەئاستێکی ناوازەوە، لەسەرەتاکانی دەستبەرکاربوونی هانزی فلیک، ئومێد و خەونی گەورەی لای هاندەرانی بارسا بۆ وەرزێکی نوێ دروستکرد، بەڵام خەونەکان رووبەڕووی راستیی تاڵی کەوتن بوونەوە.
بارسێلۆنا لەسەرەتاکانی وەرزدا، رکابەرەکانی لە لالیگا بەبەهێز و لاوازەوە لە زەویدا و لە کلاسیکۆی یەکەمی خولدا، وانەیەکی تاڵی بە ریال مەدرید بەخشی، بەڵام هەفتەکانی دواتر تیپەکە کەوتە نێو گێژاوی کەوتن و لە دەستدانی خاڵەوە.
ئەگەرچی هەرزوو باسوخواس، لەسەر یەکلابوونەوەی نازناوی لالیگا لەبەرژەوەندیی تیپەکە هاتنە ئاراوە، بەڵام شکستەکانی بەر لە پشووەکانی سەری ساڵی ئەو تیپە، جارێکی دیکە رۆحی بەبەری رکابەرییەکانی لالیگادا کردەوە و پرسیاری زۆریشی لەسەر ئاستی تیپەکە دروستکرد.
بارسێلۆنا لە هەفتەکانی دواتردا و بەر لە بەڕێکەوتن بەرەو سعودیە بۆ بەشداریکردن لە جامی سوپەردا، خۆی راستکردەوە و سەرکەوتن لە جامی شا و پاشان بڕینی ئاتلێتیک بیلباو لە جامی سوپەر، ئەوەی دووپاتکردەوە کە بارسا ئەگەرچی لە راستەڕێی سەرکەوتنەکانیش لایدابێت، بەڵام زۆر دوورنەکەوتووەتەوە.
لەبەردەم یاریی کلاسیکی ئەمشەو و گەیشتن بەیەکەم نازناوی وەرزی ئەمساڵدا، بارسێلۆنا نەوەت خولەکی دیکەی لە داهێنان و تووند وەستانەوە بەرامبەر ریال مەدرید پێویستە تاوەکو جارێکی دیکە ئەو جامە لە ئامێز بگرێتەوە.
کۆتاییەکانی 2024 بۆ بارسێلۆنا، رۆژانێکی ئاڵۆز و پڕ لە گرێوگۆڵی گەورەبوون، بەتایبەت لە دۆسێی تۆمارنەکردنی ناوی هەردوو یاریزانی یانەکە، پاو ڤیکتۆر و دانی ئۆلمۆ لە لالیگا و سەرهەڵدانەوەی کێشە داراییەکانی یانەکە.
سەرەتای ساڵی نوێ، گرێکوێرەکان بە هەواڵی چارەسەربوونی کێشەی ئەو دوو یاریزانە و سەرکەوتنی بارسێلۆنا بۆ یاریی کۆتایی جامی سوپەری ئیسپانیا کرانەوە، ئێستا لە کەتەلۆنیا هەمووان ئومێدی ئەوە دەخوازن لە شەقامەکانی هەرێمەکەدا، ئاهەنگی بەدەستهێنانی یەکەم نازناوی ئەمساڵ بگێڕن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ