وردەکارییەکانی گرێبەستی جولیان ئەلڤارێز لەگەڵ ئاتلێتیکۆ مەدرید

 

 

بەپێی راپۆرتە رۆژنامەڤانییەکانی ئینگلتەرا و ئیسپانیا، جولیان ئەلڤارێز لە مانگی ئاداری رابردوو نوێکردنەوەی گرێبەستەکەی لەگەڵ یانەی مانچێستەر سیتی رەتکردووەتەوە و ئاتلێتیکۆ مەدرید نزیکە لە راگەیاندنی گرێبەستەکەی بۆ یانەکە.

 

یانە ئیسپانییەکە کارەکانی گواستنەوەی ئەو یاریزانەی گەیاندووەتە قۆناخی کۆتایی و راگەیاندنی گرێبەستەکەی لە ئانوساتدایە.

 

بەپێی دوایین گۆڕانکارییەکان، گرێبەستی ئەو یاریزانە 90 بۆ 95 ملیۆن یۆرۆی تێدەچێت، 70 ملیۆن پاوەند لەلایەن یانە ئیسپانییەکەوە بە کاش دەدرێتە یانەی مانچێستەر سیتی و 20 ملیۆن پاوەندیش وەکو گۆڕانکاری لە گرێبەستەکەدا جێگەی کراوەتەوە و ئەگەری هەیە ئەمڕۆ بەشێوەیەکی کۆتایی کارەکانی گرێبەستەکەی تەواوبکرێن.

 

لە ئەگەری تەواوبوونی کارەکانی گرێبەستی ئەو یاریزانە بۆ ئاتلێتیکۆ مەدرید، جولیان ئەلڤارێز دەبێتە گرانترین یاریزان لە یانەی مانچێستەر سیتی فرۆشرابێت و گرێبەستەکەی لەگەڵ یانەکەی پایتەختی ئیسپانیا بۆ 5 ساڵ دەبێت.

 

گواستنەوەی جولیان ئەلڤارێز لەلایەن ئاتلێتیکۆ مەدریدەوە دەبێتە سێیەم گرێبەستی ئەو یانەیە بۆ وەرزی نوێ، لەکاتێکدا گرێبەستی لەگەڵ رۆبن لێ نۆرماند واژۆکردووە، کارەکانی گواستنەوەی کۆنۆر گالاگێری تەواوکردووە و جولیان ئەلڤارێزیش کارەکانی گواستنەوەی لە قۆناخی کۆتاییدان.

 

ئەلڤارێز تەمەنی 24 ساڵە، لە ساڵی 2022 بەرامبەر 21.40 ملیۆن یۆرۆ پەیوەندیی بە ریزەکانی یانەی مانچێستەر سیتی کرد، 225 یاریی لەسەرجەم خول و پاڵەوانێتییەکاندا بۆ ئەو یانەیە ئەنجامداوە و 90 گۆڵی تۆمارکردووە، لەگەڵ یانەکە دوو نازناوی پرێمەرلیگ و نازناوێکی خولی یانە پاڵەوانەکانی ئەورووپا، نازناوێکی جامی جیهانی یانەکان و یەکێکی جامی سوپەری ئەورووپای بەدەستهێناوە.