رووداو دیجیتاڵ
فیفا خەزێنەی خۆی بۆ ئەو تیپانە دەکاتەوە کە بەشداری لە جامی جیهانی یانەکانی 2025 دەکەن و بڕی یەک ملیار دۆلار بەسەریاندا دابەش دەکات و پشکی یانەکانی ئەورووپا زیاتر دەبێت، جگە لە ریال مەدرید.
جامی جیهانی یانەکانی 2025 لە ماوەی نێوان 15ـی حوزەیران تاوەکو 13ـی تەمموزی ئەمساڵ لە ویلایەتە یەکگرتووەکانی ئەمریکا بەڕێوەدەچێت.
بۆ یەکەمجار لە مێژووی ئەو پاڵەوانێتییەدا 32 تیپ بەشداری تێدا دەکەن، کە لەمەودوا لەبری ساڵانە هەر 4 ساڵ جارێک بەڕێوەدەچێت، وەک مۆندیالی هەڵبژاردەکان.
خەڵاتی یەک ملیار دۆلاری
بەپێی میدیاکان، فیفا بڕیارە بڕی خەڵاتە داراییەکانی ئەو پاڵەوانێتییە بگەینێتە یەک ملیار دۆلاری ئەمریکی، کە دەداتە ئەو یانانەی کە بەشداری لە مۆندیالدا دەکەن.
ئەمەش بەشێکی پەیوەستە بەو گرێبەستەی پەخشی تەلەڤزیۆنی کە فیفا لە مانگی کانوونی دووەمدا لەگەڵ خزمەتگوزاری پەخشی وەرزشی DAZN رێککەوتبوو.
یانە بەشداربووەکان بڕێک پارە لەبری بەشداریکردن لە قۆناخی کۆمەڵەکان وەردەگرن، هەروەها پارەی زیاتر لەسەر بنەمای پێشکەوتن و گەیشتن بە قۆناخەکانی دواتر بەدەستدێنن.
بەگوێرەی ئەو سەرچاوانە، فیفا و یەکێتیی یانەکانی ئەورووپا گفتوگۆ لەسەر پێدانی بڕە پارەیەکی زۆر بەو یانانە دەکەن کە بەشداری لە پاڵەوانێتییەکەدا ناکەن، ئەمەش وەک هەنگاوێک بۆ هاندانیان.
بڕیارە دواتر دابەشکردنی هاوشێوە بۆ یانەکانی ئەفریقا، ئاسیا و ئەمریکا بەدوای خۆیدا بهێنێت.
سەرچاوەکان دەڵێن، پشکی یانە ئەوروپییەکان لە داهاتی پاڵەوانێتییەکە زیاتر دەبێت لە پشکی یانەکانی کیشوەرەکانی دیکە بەهۆی گرنگی ئەو یانانە بۆ رکابەرییەکە.
ئەو پارە زیادانەی دەدرێتە یانەکانی ئەورووپا قەرەبووکردنەوەیەکە بۆ ئەوەی کە یانە ئەوروپییەکان بێبەش دەبن لەو گەشتانەی هەمیشە بەر لە دەستپێکردنی وەرزی نوێ بۆ بەدەستهێنانی داهات دەیکەن، بەتایبەتی بۆ ئەمریکا و ئاسیا.
ئەوەی گرنگە ئەوەیە، ئەم کارە تەنیا ئەو یانانە دەگرێتەوە کە ئەندامی یەکێتیی یانەکانی ئەورووپان، واتا ریال مەدرید ناگرێتەوە، بەو پێیەی پێشتر لە یەکێتییەکە کشاوەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ