رووداو دیجیتاڵ
بەڕێوەبەری کارەکانی لامین یامال هەواڵێکی خۆشی بە هاندەرانی یانەی بارسێلۆنا راگەیاند، کە پەیوەستە بەو ئەستێرە گەنجەکەی یانەی کەتەلۆنی.
خۆرخی مێندێز، بەڕێوەبەری کارەکانی لامین یامال، هاندەرانی یانەی کەتەلۆنی دڵنیاکردەوە و رایگەیاند، لامین لە بارسیلۆنا دەمێنێتەوە و گرێبەستەکەی لەگەڵ یانە ئیسپانییەکە لەدوای ساڵی 2026 درێژدەکرێتەوە.
یاریزانە تەمەن 17 ساڵەکەی ئیسپانیا، کە خەڵاتی گۆڵدن بۆی بۆ باشترین یاریزانی گەنجی تۆپی پێی ساڵی 2024ـی بەدەستهێنا، ساڵێکی درەوشاوەی پێشکەش کرد، کە تێیدا یارمەتی وڵاتەکەی دا بۆ بردنەوەی نازناوی یۆرۆی 2024. لەسەر ئاستی ئامارەکانیش لەم وەرزەدا لەگەڵ بارسێلۆنا لە سەرجەم خول و پاڵەوانێتییەکاندا 35 یاری ئەنجامداوە، 11 گۆڵی تۆمارکردووە و 16 ئەسیستیشی هەیە.
یامال دەرچووی ئەکادیمیای لاماسیایە و لەو کاتەوەی لە مانگی نیسانی 2023 یەکەم یاری لەگەڵ یانەی بارسێلۆنا ئەنجامدا، 86 یاری لەگەڵ یانە کەتەلۆنییەکە ئەنجامداوە.
خۆرخێ مێندێز دوای کۆبوونەوە لەگەڵ خوان لاپۆرتای سەرۆکی بارسێلۆنا لە شاری لیسبۆن لە پۆرتوگال، بە میدیاکانی ئیسپانیای گوت "یامال لەگەڵ بارسێلۆنا بەردەوام دەبێت، گرنگ ئەو ئێستا بیرکردنەوەی تەنیا لای بابەتە وەرزشییەکانە".
بەپێی زانیارییەکان، کۆبوونەوەکەی نێوان هەردوولا تاوەکو 4 کاژێری خایاندووە، لە کاژێر 8ـی شەو تاوەکو نیوەشەو، بەمەبەستی تاوتوێکردنی زۆر تەوەر.
بارسێلۆنا لە یاریی گەڕانەوەی قۆناخی 16ـی چامپیۆنزلیگدا، لە درەنگانی ئەمڕۆ چوارشەممە سەردانی بێنفیکای پۆرتوگالی دەکات، کە هاندەرانی بارسا چاويڕێی ئەستێرە گەنجەکەیانن لەم یارییەدا ئەنجامەکە لە بەرژەوەندی خۆیاندا یەکلایی بکاتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ