کاردۆ سدیق
رووداو دیجیتال
کاردۆ سدیق، یاریزانی لاوی کوردی یانەی کریستاڵ پاڵاس پەیامێکی لە رێگەی ئینستاگرامەکەیەوە بۆ خەڵکی کوردستان و ئەو کەسانە نارد کە شاڵاوی کۆمێنتنووسینیان بۆسەر یانەی کریستاڵ پالاس دەستپێکردووە و داوای راگرتنی ئەو کارە دەکات.
ماوەی چەند رۆژێکە هەڵمەتێک لە تۆڕی کۆمەڵایەتیی فەیسبووک دەستیپێکردووە کە هەوادارانی وەرزشی بە کۆمێنێت نووسین داوا دەکەن کاردۆ سدیق بانگهێشتی تیپی یەکەمی یانەکە بکرێت، ئەمە لە کاتێکدا کە سێ هەفتەیە کاردۆ لە تیپی لاوانەوە بۆ تیپی خوار 23 ساڵ بەرزکراوەتەوە.
هەڵمەتی ئەو کەسانەی کە داوای کاردۆ دەکەن و دەنووسن " ?Where is Cardo" واتا " کوا کاردۆ؟ " بە سەدان کۆمێنت نووسراون و بەردەوامن، چەندین ئیمۆجی و وێنەی کۆمیدییان دروستکردووە، تەنانەت کارێکیانکردووە کە هاندەرە رەسەنەکانی کریستاڵ پاڵاس زۆر بێزاربوون و لە کۆمێنتدا هەندێکجار تووشی کێشە و قسەگوتن دەبن لەگەڵ ئەو کوردانەی کە کۆمێنت دەنووسن.
کاردۆ سدیق لە ستۆریی ئینستاگرامەکەیدا بۆ جاری دووەم لەم هەفتەیەدا هاتەدەنگ و داوای راگرتنی ئەو هەڵمەتە دەکات و دەڵێت: برایان، دڵسۆزان، تکایە هێرش مەکەنە سەر کریستاڵ پاڵاس، من کاردۆم، پینچ ساڵە بەهۆی پشتگیری و ئاگاداری و پاڵپشتیی پاڵاس لە لاوانی پرێمەرلیگ یاری دەکەم، یانەکەم بە جوانترین و دڵسۆزترین شێوە رامدەهێنن، بەهۆی ئەوانەوە لە پرێمەرلیگ و لاوانی عێراق یاری دەکەم.
کاردۆ داواکارە ئەو هەڵمەتە رابگرن و پێیوایە کە ئەوەی لە سەرەتادا وەک پشتگیری لەو دەکرا ئێستا بووەتە هێرش بۆ سەر یانەکە و زەرەر لەویش دەدەدات.
یانەی کریستاڵ پاڵاس شەوی رابردوو بۆ ماوەیەک پەیجی فەیسبووکی خۆی لە لۆکەیشنی عێراقدا دەرهێنا و تەنیا بە فلتەرشکێن دەتوانرا سەردانی بکرێت، دواتر گەڕاندییانەوە، ئەمەش دۆخەکەی زۆر خراپترکرد.
کاردۆ کامەران سدیق، یاریزانێکی کوردی خەڵکی شاری سلێمانییە و تەمەنی 18 ساڵە، باڵای 193 سانتیمەترە، ماوەی پێنچ ساڵە لە ریزی تازەپێگەیشتووان و لاوانی یانەی کریستاڵ پاڵاس یاریدەکات، کاردۆ لە 24 یاریدا لەگەڵ لاوانی کریستاڵ 2 گۆڵیشی تۆمارکردووە، بەهۆی ئاستە بەرزەکەیەوە لە دڵی بەرگری بانگهێشتی هەڵبژاردەی لاوانی عێراق کراوە و دوو یاریی نێودەولەتیشی کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ