یانەی دهۆک
رووداو دیجیتاڵ
یانەی دهۆک یەکەم مەشق و راهێنانی لە سعودیە بۆ خۆ ئامادەکردن بۆ یاریی چوونی قۆناخی پێشکۆتایی جامی کەنداو ئەنجامدا و خۆی بۆ یاریی بەرامبەر یانەی ئیتیفاق ئامادەدەکات.
یانەی دهۆک وەکو نوێنەری کوردستان و عێراق، یەکەم یانەیە لە مێژوودا بگاتە قۆناخی پێشکۆتایی جامی کەنداو و بەرامبەر یانەی ئیتیفاق یاری دەکات، یاریی چوون رۆژی چوارشەممە بەڕێوەدەچێت و دوای ئەوە لە یاریی گەڕانەوەدا لە رۆژی 12ـی مانگ لە دهۆک یاریی گەڕانەوە دەکرێت.
یانەی دهۆک بە ورەیەکی بەرزەوە چووەتە دەمام و دەیەوێت بە ئاستەبەرزەکەی بە ئەنجامێکی باشەوە بگەڕێتەوە.
یاریزانانی یانەی دهۆک لە رێگەی تۆڕی میدیایی رووداوەوە بەڵێن دەدەن هەموو توانایەکیان بخەنەگەڕ بۆ ئەوەی بە ئاستێکی بەرزەوە دەربکەون و هەموو هەوڵێک دەدەن بۆ ئەوەی بە ئەنجامێکی باشەوە بگەڕێنەوە.
مەسعود میرال، راهێنەری یانەی دهۆک رۆژێک بەر لە یارییەکە لە سعودیە قسەی بۆ تۆڕی میدیایی رووداو کرد و گوتی "یاریزانەکان متمانەیان بەخۆیان هەیە، بەڵێنمان داوە هەموو توانایەکمان بخەینەگەڕ بۆ ئەوەی یارییەکی جوان بکەین و پێویستە 11 بەرامبەر 11 یاریزان بێت، نەک یەک بەرامبەر یەک".
تیمێکی تۆڕی میدیایی رووداو لە دەمامی سعودیەیە بۆ رووماڵکردنی رووداوەکانی تایبەت بە یارییەکە و گواستنەوەی سەرجەم زانیارییەکانی تایبەت بەو یارییە.
حەیدەر دۆسکی، نێردراوی رووداو بۆ رووماڵکردنی یارییەکە دەڵێت "هیچ یاریزانێکی دهۆک پێکانی نییە و هەمووان بە ورەیەکی بەرزەوە خۆیان بۆ یارییەکە ئامادەدەکەن، ژمارەیەک هاندەری یانەکەش لە دهۆکەوە گەیشتوونەتە سعودیە بۆ ئەوەی لە یاریگەدا پاڵپشتی یانەکە بکەن.
رۆژی چوارشەممە لە یاریی چوونی قۆناخی پێشکۆتایی جامی کەنداو، یانەی دهۆک لە سعودیە بەرامبەر یانەی ئیتیفاق یاری دەکات و رۆژی 12ـی ئەم مانگە یاریی گەڕانەوە لە دهۆک بەڕێوەدەچێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ