گەڕیدەی رەمەزان لە شنۆ

شنۆ شارێکی جوانی کوردستانە کە باخ و باخاتەکانی، بۆنی سێو و گێلاسەکانی پێتدەڵێن کە ئەمە شارێکی کشتوکاڵی زۆر گرنگە. ئەم شارە نزیکەی 70 کیلۆمەتر لە سەنتەری پارێزگای ورمێ دوورە و، بە بڕینی 200 کیلۆمەتر و لێخوڕینی ئۆتۆمبێل بۆ ماوەی 4 بۆ 5 کاژێر لە هەولێرەوە، مرۆڤ دەگاتە سەنتەری ئەو شارە جوانە. 

بەرنامەکە بە گفتوگۆ لەگەڵ خەڵکی شاری شنۆ دەستپێدەکات لەسەر رۆژووی مانگی رەمەزان لەم شارەدا. بەپێی قسەی خەڵکەکە، رەمەزان لە شنۆ زۆر خۆشە و خەڵک سەرەڕای رۆژوو گرتن، بەردەوامن لە چالاکییەکانی رۆژانەیان. ئەوان باس لەوە دەکەن کە رەمەزانی ئێستا لەچاو رابردوو ئاسانترە، چونکە نە تینوو دەبن و نە برسی و توانای کارکردنیان زیاترە.

بەشێکی بەرنامەکە تایبەتە بە بەردی مێژوویی کێلەشین کە خەڵکی شنۆ شانازی پێوە دەکەن. لە دوو ناوچەی شاردا، لە چواڕیانێک و لە دەروازەی شار، پەیکەری بەردی کێلەشین هەیە. بەپێی قسەی مامۆستایەکی مێژووی شنۆ، بەردی کێلەشین بەردێکی مێژووییە، کێشەکەی 170 کیلۆگرامە و لە وانەوە هاتووە. ئەم بەردە بە دوو خەتی ئاشوور و ئۆرارتوویی (خەتی بزماری) نووسراوە و لە سنووری سیدەکان و شنۆ دانراوە. بەردەکە لەساڵی 1835 هاتووەتە ئەو ناوچەیە و، نووسراوەکەی باس لە سەفەرێکی پۆیەنی کوڕی ساردۆ، شای مەزنی ناهێری، دەکات.

لە بەشێکی دیکەی بەرنامەکەدا، سەردانی بنکەیەکی خێرخوازی دەکرێت کە 15 ساڵ پێش ئێستا لە شنۆ دامەزراوە. ئامانجی ئەم بنکەیە ئەوەیە کە ژنان بتوانن کار بکەن و بەرهەمی خۆماڵی وەکو نان، شیرینی، دۆشاو و هەموو پێداویستییەکانی بازاڕ دروست بکەن. هاوکات، ئەم بنکەیە بە مەبەستی کەمکردنەوەی هەژاری و یارمەتیدانی هەژارەکان لە شنۆ دامەزراوە و لەو ماوەیەدا زۆر سەرکەوتوو بووە. بەردەوام لە بنکەکەدا باس لە چالاکییە خێرخوازییەکانی مانگی رەمەزان دەکرێت. بەپێی قسەی بەرپرسی بنکەکە، لە رەمەزاندا بۆ هەموو هەژاران بەبێ بەرامبەر بەربانگ دەبەن. رەمەزان مانگێکی زۆر پڕبەرەکەت و پیرۆزە لەلای هەموو موسڵمانەکان، بەتایبەت لای خەڵکی شنۆ، و خێرخوازێکی زۆر بەبێ بەرامبەر یارمەتی خەڵکی کەمدەرامەت دەدەن.