فیچەر - رۆژانە 20 هەزار مەتر چوارگۆشە گەچ لە موسڵ بەرهەمدەهێندرێت

سەحاجی شاری موسڵ، گەورەترین ناوچەی بەرهەمهێنانی گەچ هەیە. کە 60 کیلۆمەتر دەکەوێتە باشووری رۆژئاوای موسڵ. گەچی موسڵ بە باشترین جۆرەکانی گەچ لە عێراق دادەنرێت.
 
لەم کارگانە، رۆژانە 20 هەزار مەتر چوارگۆشە گەچ بەرهەمدەهێنرێت و بۆ هەموو ناوچەکانی عێراق دەنێردرێت.
 
ئەحمەد حوسێن حەربی، وەستای دروستکردنی گەچ دەڵێ "لەم چیایانەدا بەردی گەچ دەردەهێنین و پاشان دەیانهێنینە نێو کوورەکان، 25 تا 26 کاژێر لسەر ئاگریان دادەنێین دواتر  لە ئاش دەهاڕدرێت  و هەناردەی هەموو پارێزگاکانی عێراق دەکرێ''.
 
ئەم کرێکارانە رۆژانە تەنیا 3 کاژێر کاردەکەن، لە بەرەبەیانییەکی زوو تاوەکو دەرکەوتنی خۆر، کاتێک خۆر دەردەکەوێ کاری بەرهەمهێنانی گەچ رادەوەستێت. بۆ هەر کاژێرێک کارکردن هەر کرێکارێک 3500 دیناری پێدەدرێت.
 
ئەحمەد شێبان، کرێکارێکی کارگەکەیە و دەڵێ ''من خەڵکی گوندی سەحاجیم لە دایکبووی 1974-م نزیکەی 35، 40 ساڵە لەم کارەدام، ئەوانەش کە لێرە کاردەکەن هەموویان خێزاندار و هەژارن. رۆژانە 4 کاژێر لێرە کاردەکەین هەر کاژێرێك بە سێ هەزار و 500 دینار".
 
دوای ئەوەی گەچەکە ئامادەدەبێت، کرێکارەکان دەیخەنە ناو کیسی تایبەت و ئامادەی دەکەن بۆ دابەشکردن، دواتر لە بازاڕەکاندا دەفرۆشرێن.
 
گەچی موسڵ لە زۆربەی ناوچەکان بۆ باڵەخانە خانوو بەکاردەهێنرێت و گەچکاری پێدەکرێت.