لە تورکیا رێژەی هەڵاوسان رادەگەیێنرێت؛ 'روونی ناکەنەوە چۆن دەیپێون بۆیە مایەی متمانە نییە'

 

ئارزوو چەرکەزئۆغڵو، سەرۆکی فیدراسیۆنی سەندیکاکانی کرێکارانی رەنجدەرانی تورکیا (دیسک) دەڵێت "دەستەی ئاماری تورکیا ساڵانێکە رێژەی هەڵاوسانی نزم و هەڵە پێوانە دەکات و، ماوەی 20 مانگە سەبەتەی هەڵاوسان راناگەیێنێت، بە رانەگەیاندنی سەبەتەی هەڵاوسانیش روونی ناکاتەوە چۆن هەڵاوسانەکە دەپێوێت."

 

ئابووریی تورکیا لە ساڵانی رابردوودا بە زنجیرەیەک قەیراندا تێپەڕیوە. سەرچاوە سەربەخۆکان دەڵێن هەڵاوسانی راستەقینە زیاترە لە رێژەی فەرمی، کە 61.36٪ ـە. 

 

لە دوای هەڵبژاردنی سەرۆککۆمار و پەرلەمانی تورکیا لە 14ـی ئایاری پارساڵەوە، تائێستا بانکی ناوەندیی تورکیا رێژەی سوودی لە 8.5٪ بۆ 45٪ بەرزکردووەتەوە، بەڵام لیرەی تورکی بەرامبەر دۆلار و دراوە بیانییەکانی دیکە نەوەک جێگیر نەبووە، بگرە زیاتر بەهای لەدەستداوە.

 

ئێستا یەک دۆلاری ئەمریکی لە تورکیا بە 30.52 لیرە مامەڵەی پێوەدەکرێت. 

 

 

تویک ساڵانێکە هەڵاوسانی نزم و هەڵە پێوانە دەکات، بەمەش بووەتە هۆی هەژاربوونی ملیۆنان کەس. لە هەمانکاتدا تویک نزیکەی دوو ساڵە، واتا لە حوزەیرانی 2022 ـەوە تائێستا کاتێک هەڵاوسان رادەگەیێنێت، ئاشکراکردنی ئەو سەبەتەی شتومەکییەی وەستاندووە کە لەکاتی روونکردنەوەی هەڵاوساندا بەکاریدەهێنێت، واتە راگەیاندنی ئەو سەبەتەیەی راگرتووە کە 400 بابەت لەخۆدەگرێت. تویک بە رانەگەیاندنی سەبەتەی هەڵاوسان، روونی ناکاتەوە چۆن هەڵاوسان دەپێوێت. لەم پرۆسەیەدا کە جیاوازی نێوان ئەو هەڵاوسانەی رۆژانە ئەزموونی دەکەین و ئەو هەڵاوسانەی تویک باسی دەکات وردە وردە فراوانتر دەبێت، تادێت متمانە بەو داتایەی تویک رایدەگەیێنێت کەم دەبێتەوە.