میدیای فەرمیی سووریا: لە هێرشێکی ئیسرائیل بۆ سەر دیمەشق سێ کەس کوژران

 

ئەمڕۆ (چوارشەممە، 02-10-2024) میدیای فەرمیی سووریا بڵاویکردەوە "لە دوژمنکارییەکی ئیسرائیل بۆ سەر باڵاخانەیەکی نیشتەجێبوونی گەڕەکی مەززێ لە دیمەشق" سێ سڤیل کوژران و سێ کەسی دیکەش بریندار بوون.

 

لە هێرشێکی هاوشێوەدا لە رۆژی 20-01-2024، ئێران بۆردوومانی هەمان گەڕەکی کرد و لانیکەم چوار ئەندامی سوپای پاسداران کوژران. ئێران ئەو کات رایگەیاند "دووانیان فەرماندە بوون." هێرشەکە بەجۆرێک گەورە بوو، باڵاخانەیەکی چوار نهۆمیی تەختی زەوی کرد.

 

دوو فەرماندەکەی فەیلەقی قودسی سوپای پاسداران بریتیی بوون لە حاج سادق ئومیدزادە (ناسراوە بە حوجەتوڵا ئومێدەوار)، جێگری فەرماندەی فەیلەقی قودسی سوپای پاسداران بوو بۆ کاروباری ئەمنی، لەگەڵ جێگرەکەی بە ناوی حاج غوڵام موحەڕەم ( ناسراو بە عەلی ئاغازادە).

 

دوای هێرشەکە، ناسر کەنعانی، گوتەبێژی وەزارەتی دەرەوەی ئێران رایگەیاند "کۆماری ئیسلامیی ئێران بە مافی خۆی دەزانێت لە شوێن و کاتی گونجاو، وەڵامی تیرۆری قەوارەی زایۆنیی ساختە بداتەوە."

 

بەپێی ئامارەکانی روانگەی سووری بۆ مافەکانی مرۆڤ، لەسەرەتای ئەمساڵ تاوەکو سەرەتای ئەیلوول، ئیسرائیل 64 جار هێرشیکردووەتە سەر سووریا، 47 لەو هێرشانە ئاسمانی و، 17ـیان زەوینی بوون، بەهۆیانەوە 139 ئامانجی وێرانکردووە لە کۆگەی چەک، تەقەمەنی، بارەگا، سەنتەر و ئامێرەکان.