چیرۆکی گیانلەدەستدانی دوو منداڵ بە ئاگر
رووداو دیجیتاڵ
دوای سووتانی دوو منداڵی شارۆچکەی زەعفەرانییەی بەغدا، خەم و پەژارەیەکی زۆر باڵی بەسەر خەڵکی شارۆچکەکەدا کێشاوە. منداڵەکان تەمەنیان چوار و حەوت ساڵان بوو. ئەوان لە شیرینیی خەودا بوون، لەناکاو ئاگر کڵپەی کرد و دوایین هەناسەی لێ سەندن.
ئاگرەکە هێندە بەخێرایی تەشەنەی کرد کە دایکی منداڵەکان سەرەڕای هەوڵدانێکی زۆر نەیتوانی رزگاریان بکات.
مەحموود شاکر، شایەتحاڵە و دەڵێت، "باوکی منداڵەکان وەک هەموو رۆژانی دیکەی ئاسایی، بەیانیی زوو منداڵ و خێزانەکەی لە خەودا بەجێهێشت و چووە سەر کار. ئێمە ئەو کاتە زانیمان کە ئاگرەکە لە بەشی پێشەوە کڵپەی کرد، دیار بوو شۆرتی کارەبا هۆکاری کەوتنەوەی ئاگرەکە بووە، ئیدی دوو منداڵ مردن و دایکەکە رزگاری بوو."
تەرمی دوو منداڵەکە بەرەو دوایین شوێنیان لەسەر زەوی بران، رووداوەکە هێندە سەختە، ئازارەکەی لەسەر رووخساری هەموو ئامادەبووانی پرسەکە بەڕوونی دیارە.
حسێن خەفاجی، باوکی منداڵەکانە و دەڵێت، شۆرتی کارەبا ئاگری لە سەندویچ پانێڵەکە بەرداوە، سوپاس و ستایش بۆ خودا لە هەموو دۆخێکدا. من کاری پاسەوانی دەکەم و کاتی ئاگرەکە منداڵ و خێزانەکەم خەوتبوون.
مامێکی منداڵەکان بەناوی جەبار خەفاجی ئاماژەی بەوە کرد، هێزە ئەمنییەکان هاتن و لێکۆڵینەوەیان کرد، تێبینییان کرد شۆرت لە کارەباکەدا هەبووە. بەشێکی خانووەکەش لە سەندویچ پانێڵ دروستکراوە و ئەویش وەک بەنزین وایە و کاتێک ئاگری گرت بە تیمەکانی ئاگرکوژێنەوەش ناکوژێتەوە، دراوسێکانیش زۆر هەوڵیان دابوو، بەڵام نەیانتوانی بوو بیکوژێننەوە. یەکێک لە منداڵەکان بە دووکەڵ خنکاوە و ئەوی دیکە سووتاوە.
بەپێی ئامارە فەرمییەکانیش، لە سێ مانگی سەرەتای ئەم ساڵدا زیاتر لە پێنج هەزار ئاگرکەوتنەوە لە عێراق تۆمارکراون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ