لە پارێزگای دیالە پێوەدانی مار و دووپشک بە رێژەی 60% زیادیکردووە

 

 

فارس عەزاری، بەڕێوەبەری راگەیاندنی تەندروستیی دیالە بە تۆڕی میدیایی رووداوی راگەیاند، "چارەسەرییەکانی تایبەت بە پێوەدانی مار و دووپشکمان لە پارێزگای دیالە هەیە و چارەسەرییەکان بەسەر نەخۆشخانەکانی بەعقوبە و بەلەدروز و جەلەولا دابەشکراون بۆئەوەی پارێزگاری لە نەخۆش بکرێت و دوورییەکان زۆر نەبێت."

 

قاوشەکانی فریاکەوتنی نەخۆشخانەی فێرکاریی بەعقوبە لە مانگی تەممووزی ئەمساڵدا 168 نەخۆشی وەرگرتووە کە لە ناوچە جیاوازەکانی پارێزگای دیالە مار و دووپشک پێوەی دابوون و سەرجەم نەخۆشەکان چارەسەرییان بۆ کراوە و هیچ گیانلەدەستدانێکیش بەو هۆیەوە تۆمار نەکراوە.

 

بەپێی قسەکانی بەڕێوەبەری راگەیاندنی تەندروستیی دیالە، پێوەدانی مار و دووپشکی ژەهراوی لەم هاوینەدا بە رێژەی 60% زیادیکردووە، بەتایبەت لە گوندەکان. لەبارەی هۆکارەکەشیەوە دەڵێت، "بەهۆی بەرزبوونەوەی پلەکانی گەرما و وشکەساڵییەوە بووە."

 

هاووڵاتییانی عێراق، بەتایبەت گوندنشینان، لە هاوین و وەرزی گەرمادا زۆربوونی خشۆک و مار و دووپشکە ژەهراوییەکان نیگەرانی کردوون، چونکە لەو وەرزەدا لە کونەکانیان دێنە دەرەوە و بەرەو ماڵ و گۆڕەپان و کێڵگەکان دەڕۆن.

 

مار، مشک و جرجەکانیش گەیشتوونەتە قوتابخانەکان و مەترسییان لەسەر قوتابیانی ناوچە گوندنشینەکان لە عێراق دروستکردووە.

 

عێراقییەکان لەسەر ئەو دۆخانە لە هەموو هاوینێکدا راهاتوون، بەڵام بەرزبوونەوەی زۆری پلەکانی گەرما و وشکەساڵی، کە زیانی زۆری بە ناوچە کشتوکاڵییەکان گەیاندووە، وایکردووە ئەو زیندەوەرانە بچنە نێو ماڵان.

 

بەپێی پسپۆڕانی کەشوهەوا، عێراق زۆرینەی کات لە ماوەی وەرزی هاویندا کاریگەرە بە درێژبوونەوەی بارستایی هەوای گەرم و وشکیی ناوەڕاستی ئاسیا، کە دەبێتە هۆی ئەوەی بەشێک لە رۆژانی ئەو وەرزە پلەکانی گەرما بۆ سەروو 50 پلەی سیلیزی لە هەردوو ناوچەکانی باشوور و ناوەڕاستی عێراق بەرز ببنەوە.