رووداو دیجیتاڵ
سەنتەری میدیای ژمارەیی عێراق (DMC) دەڵێت، بەپێی چەند دامەزراوەیەکی تایبەت بە ژمارەی بەکارهێنەرانی سۆشیاڵ میدیا، دەردەکەوێت لە باشووری کوردستان و عێراق 25 ملیۆن و 530 هەزار کەس تۆڕە کۆمەڵایەتییەکان بەکاردەهێنن و یوتیووب و تیکتکۆک لە ریزبەندی یەکەم و دووەمی بەکارهێنەرانن. مامۆستایەکی زانکۆش دەڵێت، ژمارەی بەکارهێنەرانی سۆشیاڵ میدیا لە عێراق بەراورد بە ژمارەی دانیشتوان زۆرە.
رۆژی سێشەممە، 14-2-2023، سەنتەری میدیای ژمارەیی عێراق (DMC) ژمارەی بەکارهێنەرانی سۆشیاڵ میدیای لە باشووری کوردستان و عێراق بڵاوکردەوە. بەپێی ئامارەکان کە لە هەردوو دامەزراوەی "We are social" و " Meltwater" تایبەت بەو بوارە وەریگرتوون، جیاوازی لە بەکارهێنەرانی سۆشیاڵ میدیا هەیە.
ئامارەکان دەریدەخەن، یوتیووب زۆرترین بەکارهێنەری لە باشووری کوردستان و عێراق هەیە کە لەکۆی ئەو 25 ملیۆن و 530 هەزار بەکارهێنەرەی سۆشیاڵ میدیا، بەکارهێنەرانی یوتیووب گەیشتووەتە 24 ملیۆن و 300 هەزار کەس؛ بەکارهێنەرانی تیکتۆکیش 23 ملیۆن و 880 هەزار کەسن.
هێرۆ محەممەد سلێمان، مامۆستای بەشی زانستی کۆمپیوتەر و تەکنەلۆژیای زانیاری لە زانکۆی سەڵاحەدین لەبارەی ئامارەکانەوە بە رووداوی گوت: "ئەو ژمارەیەی بەکارهێنەرانی سۆشیاڵ میدیا لە عێراق بەرزە بەراورد بە ژمارەی دانیشتووان کە نزیکەی 42 ملیۆن کەس دەبن. ئەمە ئاماژەیەکی خراپە، چونکە ژمارەکە بەرزە."
هێرۆ محەممەد سلێمان گوتی: "بەکارهێنەرانی تیکتۆک زۆرن. ئەمە بەشێکی زۆری پەیوەندی بەوەوە هەیە کە ئێستا گەنج و هەرزەکار و تەنانەت منداڵانیش زۆر ئەم تۆڕە بەکاردەهێنن. بەشێکی بەکارهێنانەکەی ئەوەیە گرتەی ڤیدیۆیی زۆری تێدا نیشاندەدرێت. بەشێک لە سەرکێشی و لاساییکردنەوەکانی تێدا دەکرێت، بەڵام بەگشتی ئەمە ئاماژەیەکی باش نییە کە بەکارهێنەرانی تیکتۆک روو لە زیادی دەکەن."
بەپێی سەنتەری میدیای ژمارەیی عێراق (DMC): بەکارهێنەرانی سۆشیاڵ میدیا لە عێراق بەمشێوەیە دابەشبوون:
- فەیسبووک؛ 17 ملیۆن و 950 هەزار کەس بەکاریدەهێنن. ئەمساڵ 900 هەزار کەس کەمتر بەکاریدەهێنن بەراورد بە ساڵی 2022.
- ئینستاگرام؛ 14 ملیۆن کەس بەکاریدەهێنن؛ ملیۆنێک و نیو کەس کەمتر لە ساڵی 2022 بەکاریدەهێنن.
- ماسنجەری فەیسبووک؛ 15 ملیۆن و 100 هەزار کەس بەکاریدەهێنن؛ نزیکەی ملیۆنێک و 100 هەزار کەس کەمتر لەساڵی پار بەکاریدەهێنن.
- سناپچات؛ 16 ملیۆن و 100 هەزار کەس بەکاریدەهێنن؛ ئەمساڵ 2 ملیۆن و 300 هەزار کەس لە ساڵی 2022 زیاتر ئەم ئەپلیکەیشنە بەکاردەهێنن.
- تویتەر؛ 2 ملیۆن و 500 هەزار کەس بەکاریدەهێنن، واتە ئەمساڵ 600 هەزار کەس زیاتر لەساڵی 2022 ئەم ئەپلیکەیشنە بەکاردەهێنن.
- لینکدئین؛ 1 ملیۆن و 700 هەزار کەس بەکاریدەهێنن، ئەوەش 300 هەزار کەسی زیاترە لەساڵی 2022.
بەپێی ئامارەکە بەکارهێنەرانی بەشێکی زۆری سۆشیاڵ میدیا، فەیسبووک و ئینستاگرام و ماسنجەر نەبێت، زیادیکردووە، ئەو تۆڕانە ئەمساڵ نزیکەی سێ ملیۆن و 500 هەزار بەکارهێنەریان لەدەستداوە بەراورد بەساڵی 2022. بەکارهینەرانی سناپچات و تویتەر و لینکدئینیش زیادیکردووە.
بەپێی ئامارەکانی سەنتەری میدیای ژمارەیی عێراق (DMC)، لەساڵی 2022 بەکارهێنەرانی سۆشیاڵ میدیا لە عێراق 28 ملیۆن و 350 هەزار کەس بوون، لە ساڵی 2021یشدا 25 ملیۆن کەس بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ