کرێکارانی بەنداوی مووسڵ مانیان گرتووە

 

بەپێی چەند سەرچاوەیەک لە شاری مووسڵی سەر بە پارێزگای نەینەوا، کە یەکێکیان کرێکارێکی بەنداوی مووسڵە، دوێنێ پێنجشەممە بەشێکی زۆری کرێکارەکانی بەنداوەکە کارەکانیان راگرت و داوای خەرجکردنی شایستە داراییەکانیان دەکەن.

 

یەکێک لەو کرێکارانە بە رووداوی گوت: "شەش مانگ دەبێت دەرماڵەی خواردن و مەترسییمان بۆ خەرج ناکرێت کە نزیکەی 250 هەزار دینارە، بۆیە ئێمەش کارەکانمان راگرتووە، هەرچەندە هەڕەشەی دەرکردن و دوورخستنەوەشمان کراوە، بەڵام ئێمە ئاوا کارناکەین، مافی خۆمان دەوێت."

 

ئەو کرێکارانەی لە بەنداوەکە کاردەکەن، بەشێکیان فەرمانبەری فەرمین و لە بەشی تێکردن دامەزراون، بەشێکیشیان بە گرێبەست دامەزراون، ئەرکیان کاری تێکردنە لە بەنداوی مووسڵ بۆ ئەوەی لە رووخان و کەوتن بپارێزرێت.

 

بەهۆی ئەوەی لەسەر خاکێکی فشۆڵ دروستکراوە، خاکی بەنداوی مووسڵ دادەتەپێت، بۆیە لەرێگەی هەڵکەندنی خوڵەکەیەوە بنچینە و ژێر بەنداوەکە بە چیمەنتۆ پڕدەکرێتەوە.

 

راگرتنی کارەکانی تێکردنی بەنداوی مووسڵ لەلایەن محەممەد خالید ئیبراهیم، جێگری بەڕێوەبەری بەنداوی مووسڵەوە رەتکرایەوە، لە گرتەیەکی ڤیدیۆییدا رایگەیاند: "کارەکانی هەڵکەندن و تێکردن درێژەی هەیە و بەردەوامە، ئەوەی لە تۆڕەکانی سۆشیاڵ میدیا باسدەکرێت راست نییە، گوایە کارەکانی هەڵکەندن و تێکردن راوەستاوە، فەرمانبەرانی بەنداوی مووسڵ بەشێوەی رێکوپێک لە کارکردن بەردەوامن."

 

بەنداوی موسڵ گەورەترین بەنداوە لەسەر ئاستی عێراق و چوارەم گەورەترین بەنداوە لەسەر ئاستی رۆژهەڵاتی ناوەڕاست، بەنداوەکە لە ساڵی 1981 لەلایەن دوو كۆمپانیای بیانی دروستکراوە و توانای گلدانەوەی زیاتر لە 11 هەزار و 100 ملیۆن مەتر سێ جا ئاوی هەیە.

 

تێکردنی چیمەنتۆ بۆ پارێزگاریی لە بەنداوەکە لە ناوەڕاستی ساڵانی هەشتاکانەوە دەستیپێکردووە، پێشتر چەندین جار هۆشداریی لە رووخانی بەنداوەکە دراوە.