کاتی هێرشە درۆنییەکەی ئیسفەهان
رووداو دیجیتاڵ
شەوی رابردوو لە ئیسفەهان کارگەیەکی سەربازیی کرایە ئامانج، دواتر سوپای ئێران لە رایگەیاند، هێرشکردنە سەر ناوەندەکە بە سێ درۆن بووە، یەکێک لە درۆنەکان بە سیستمی دژە مووشەکی تەقێنراوەتەوە و دوو درۆنەکەی دیکەش کەوتوونەتە داوی سیستمی بەرگریی ناوەندەکە و بە ناچاری خۆیان تەقاندووەتەوە.
سوپای ئێران هێرشەکەی بە "ناسەرکەوتوو" لە قەڵەمداوە؛ بەپێی راگەیێنراوی سوپاکە، "هێرشەکە زەرەر و زیانێکی ئەوتۆی نەبووە، کێشەی بۆ دامودەزگە و چالاکییەکانی کۆمەڵگەکە دروست نەکردووە." تەلەفزیۆنی ئێران بڵاویکردەوە، ناوەندێکی دروستکردنی تەقەمەنی وەزارەتی بەرگریی بووە کە تەقیوەتەوە.
محەممەد رەزا جان نساری، جێگری پارێزگاری ئیسفەهان دەڵێت: "خەڵک سەرەتا هەندێک نیگەران بوون، بەڵام بە خێرایی خەڵک ئاگادارکرایەوە کە تەنیا سەربانی یەکێک لە هۆڵەکانی ئەوێ زیانێکی کەمی بەرکەوتووە. هیچ زیانێکی گیانی نەبووە و ئەو کۆمەڵگەیە بە هەموو هێز و تواناییەوە درێژە بە کارەکانی دەدات."
بەپێی ئەو هەواڵانەی بڵاوبوونەتەوە، دوای تەقینەوەکان هێزە سەربازی و ئەمنییەکان شەقامەکانی نزیک تەقینەوەکەیان داخست و رێگەیان نەدا خەڵک لەوێوە هاتووچۆ بکات.
شەوی رابردوو هاوکات لە شاری تەورێزیش ئاگرێکی گەورە لە شارۆچکەی پیشەسازیدا کەوتەوە. محەممەد باقر هونەربەر، بەڕێوەبەری کۆنترۆڵی قەیرانی پارێزگای تەورێز گوتوویەتی: کارگەیەکی رۆنی ماتۆڕ بووە سووتاوە، بەڵام نەیگوتووە هۆکاری ئاگرکەوتنەوەکە چی بووە.
لە رابردووشدا زۆر جاران ناوەندە ئەتۆمی و سەربازییە گرنگەکانی ئێران کراوەتە ئامانج و ئیسرائیل وەک ئەنجامدەریان تۆمەتبار کراوە. بەڵام بەرپرسانی ئیسرائیل دانیان بەو هێرشانەدا نەناوە.
ئێران تەنیا وڵاتێکە لە ناوچەدا بەرنامەیەکی ئەتۆمی هەیە، گەرچی خۆی دەڵێت: بەرنامە ئەتۆمییەکانی مەبەستی ئاشتیخوازانەیان هەیە، بەڵام وڵاتانی رۆژئاوایی لێی بە گومانن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ