شەقامێکی پارێزگای ئیلام
رووداو دیجیتاڵ
بەشێک لە داری دارستانەکانی زاگرۆس لە پارێزگای ئیلام دەبڕدرێنەوە بە مەبەستی لێدانی یەک لە گەورەترین چاڵە گازەکانی ئێران کە ناسراوە بە "چاڵی بانکۆڵ" و بڕیارە تاوەکو کۆتایی ئەمساڵی هەتاوی، ساڵانە پێنج ملیار و نیو مەتری سێجا گازی سرووشتی لێ دەربهێنرێت، بەڵام ئەوە ناڕەزایی بەشێک لە هاونیشتمانییانی لێکەوتووەتەوە.
حەسەن بەهرامنیا، پارێزگاری ئیلام دەڵێت، "ئەو چاڵەی کە ئێستا خەریکین لە بانکۆڵ لێیدەدەین، بەپێی لێکۆڵینەوەکانمان کۆگایەکی گەورەی گازی سرووشتییە و بڕی ئەو گازەی کە تێیدایە دوو هێندە و نیوی چاڵە گازەکەی بیجاڕە. واتە 15 ملیۆن مەتری سێجا گازمان دەبێت لە رۆژێکدا. دەبێ بزانین چ هەلیکارێکی گەورە دەڕەخسێنێت و چ کاریگەرییەکی لە گەشەپێدانی پارێزگاکەمان دەبێت."
بڵاوکردنەوەی دیمەنی بڕینەوەی داری دارستانەکە لە لایەن ژینگەپارێزانی ئیلام و پارێزەرانی دارستانەکانی زاگرۆسەوە، بووەتە هۆی رێکخستنی کەمپینێک بۆ بەرەنگاربوونەوەی پڕۆژەکە.
کەمپینی مەیدانی گازی بانکۆڵ، کە نزیکەی دوو مانگە دەستی بە چالاکی کردووە و تاوەکو ئێستا لە چەند نامەی جیاوازدا بۆ نوێنەری رێبەری کۆماری ئیسلامی، سەرۆککۆماری ئێران، رێکخراوی پاراستنی ژینگە و پەرلەمنتارانی ئیلام، هۆشداری لە کاریگەرییەکانی چاڵە گازی بانکۆڵ لەسەر دارستانەکانی زاگرۆس دەدات.
عەلی ئەکبەر بەستامی، نوێنەری ئیلام لە پەرلەمانی ئێران گوتی، "پێویستە وێڕای گەشەپێدانی ئابووری لە چاڵەگازی بانکۆڵ و رەخساندنی هەلیکار، هەوڵی تایبەتیش بدرێت بۆ پاراستنی ژینگەی ئیلام."
کەمپینەکە وێڕای نیگەرانیی جدی لە لەنێوچوونی ژینگەی ئیلام، باس لەو خزمەتگوزارییانەش دەکات کە ساڵانێکە بەسەر هەموو سامانێکی سرووشتیی پارێزگاکەیاندا، خەڵک لێی بێبەشن و بەشێک لە پەرلەمانتارانیش پشتگیری ئەو بۆچوونە دەکەن.
سارا فەلاحی، نوێنەری ئیلام لە پەرلەمانی ئێران باسی لەوە کرد، "زۆربەی ئەو وەبەرهێنانانەی لە پارێزگاکەماندا دەکرێت و کۆبوونەتەوە، هیچ سوودێکیان بۆ گەنجەکانمان نەبووە. چۆن دەکرێت لە زێدی دەوڵەمەندی بابوباپیرانمان، گەنجەکانمان بەهۆی هەژاری خۆیان بکوژن."
بەڵام حکومەت سوورە لەسەر بەردەوامبوونی پڕۆژەکە و پێی وایە دەتوانێت کێشەکانی بواری وزەی ناوچەکەی پێ چارەسەر بکات.
حەسەن بەهرامنیا، پارێزگاری ئیلام گوتی، "پڕۆژەکانی هەر پارێزگایەک بە لەبەرچاوگرتنی بەرژەوەندییەکانی ناوچەکە جێبەجێ دەکرێت. بەهۆی بڕینەوەی چەند دارێک نابێ ببینە لەمپەر بۆ گەشەپێدانی پارێزگایەک، ئەگەر وێرانکارییەکیش لە ئێکۆسیستمی ناوچەکە رووبدات دەبێ قەرەبوو بکرێتەوە."
بەگوێرەی ناوەندی ئاماری ئێران، رێژەی هەڵاوسان لە ئیلام 53٪ و رێژەی بێکاریش 6.9٪ـە. لە کاتێکدا 6٪ـی نەوت و 11٪ـی گازی ئێران لە پارێزگای ئیلام بەرهەمدێت، بە گوتەی پەرلەمانتارانی ئەو پارێزگایە؛ کەمتر لە 1٪ـی گەنجانی ئیلام لەو کەرتەدا دادەمەزرێندرێن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ