نەتەوە یەکگرتووەکان بۆ ئێران: لەسێدارەدان بوەستێنە

 

 

ڤۆلکەر تورک، کۆمیسیاری باڵای مافی مرۆڤی نەتەوە یەکگرتووەکان ئەمڕۆ سێشەممە 10-01-2023 راگەیێندراوێکی لەبارەی لەسێدارەدانی ژمارەیەک لە دەستبەسەرکراوانی خۆپێشاندانەکانی ئێران بڵاوکردەوە و رایگەیاند، جگە لەو چوار کەسەی لە یەک مانگی رابردوودا لەسێدارە دراون، 17 دەستبەسەرکراوی دیکەی خۆپێشاندانەکانیش بە لەسێدارەدان سزا دراون و مەترسیی جێبەجێکردنی سزاکەیان لەئارادایە.

 

کۆمیسیاری باڵای مافی مرۆڤی نەتەوە یەکگرتووەکان دەڵێت، دەسەڵاتی ئێران بۆ ترساندنی خەڵک و سەرکوتی ناڕەزاییەکان، دەستبەسەرکراوان بە لەسێدارەدان سزا دەدات و ئەوەش پێچەوانەی یاسا نێودەوڵەتییەکانی بواری مافی مرۆڤە.

 

رەوتی لێکۆڵینەوە و دادگایی ئەو چوار کەسەی لە یەک مانگی رابردوودا لەسێدارە دراون، بە گوتەی ڤۆلکەر تورک، "دادپەروەرانە و یاسایی نەبووە" و رێگە بە تۆمەتباران نەدراوە بەرگری لە خۆیان بکەن و پارێزەر بگرن بۆ بەرگریکردن لێیان؛ هەروەها مافی تانە لێدان لە سزاکەشیان پێنەدراوە.

 

ڤۆلکەر تورک داوا لە دەسەڵاتی ئێران دەکات، دەنگی ناڕازییان ببیستێت و چاکسازیی یاسایی و سیاسیی پێویست بکات و رێز لە جیاوازیی بیروڕا، ئازادیی خەڵک و مافی ناڕەزایی دەربڕین و مافەکانی ژنان بگرێت. هەروەها داوا دەکات، دەسەڵاتی ئێران رێز لە گیان و دەنگی خەڵکی ئەو وڵاتە بگرێت و "بە خێرایی سزای لەسێدارەدان رابگرێت."