رۆژهەڵاتی نێوەڕاست
رۆژی 22ـی مانگی رابردووش هێرشێکی درۆنی کرایە سەر ماڵی کەنار دەریای نەتەنیاهوو، ئەم وێنەیە شوێنەواری هێرشەکەیە بە ماڵەکەوە
رووداو دیجیتاڵ
پۆلیسی ئیسرائیل و دەزگەی شاباک رایانگەیاند، دوو بۆمبی رووناکی لەلایەن کەسانی نەناسراوەوە فڕێدراونەتە ماڵەکەی بنیامین نەتەنیاهوو، سەرۆکوەزیرانی ئیسرائیل لە قودس/ئۆرشەلیم، بەڵام نەتەنیاهوو و خێزانەکەی لەو کاتەدا لە ماڵ نەبوون و سەلامەتن.
دەزگا ئەمنییەکانی ئیسرائیل رووداوەکە بە "مەترسیدار" دادەنێن و دەڵێن، دەستیان بە لێکۆڵینەوە کردووە.
هێرشەکە لەکاتێکدایە ئیسرائیل لە هێرشەکانی بۆ سەر لوبنان و غەززە بەردەوامە. هەروەها هاوکاتە لەگەڵ ناڕەزایی بەرفراوانی شەقامی ئیسرائیلی کە رۆژانە بە خۆپێشاندان داوای کۆتاییهێنان بە جەنگ و رێککەوتن لەگەڵ حەماس دەکەن بۆ ئەوەی بارمتەکان ئازادبکرێن.
ئیتمار بن گڤیر، وەزیری ئاسایشی نیشتمانیی ئیسرائیل بە کەناڵ 12ـی ئیسرائیلی گوتووە، "دژایەتیکردنی نەتەنیاهوو، هەموو سنوورێکی بەزاندووە. ئەمڕۆ بۆمبی رووناکی هەڵدراوە، سبەی گوللـەی پێوە دەنرێت."
هاوکات یائیر لاپید، سەرۆکی ئۆپۆزسیۆنی ئیسرائیل رایگەیاند، "بەتووندی سەرکۆنەی هێرشەکە دەکەم و چاوەڕێی ئەوەم تاوانکاران بدۆزرێنەوە و سزا بدرێن."
ئیسحاق هێرزۆگ، سەرۆکی ئیسرائیلیش رووداوەکەی بە "زۆر مەترسیدار" ناوبرد و گوتی "بە توندی سەرکۆنەی دەکەم."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ