رووداو دیجیتاڵ
بەڕێوەبەری گەشتیاری و میراتە کولتوورییەکانی پارێزگای لوڕستان دەڵێت، زیاتر لە 700 هەزار گەشتیار لە پشووی نەورۆزدا سەردانی پارێزگاکەیان کردووە.
ئەمڕۆ دووشەممە 31ی ئاداری 2025، عەتا حەسەن پوور، بەڕێوەبەری گەشتیاری و میراتە کولتوورییەکانی پارێزگای لوڕستانی رۆژهەڵاتی کوردستان رایگەیاند: "بەگوێرەی دوایین ئامار، لە 16 رۆژدا 742 هەزار و 431 گەشتیار هاتوونەتە پارێزگای لوڕستان، کە بەراورد بە هەمان ماوەی پار، بە رێژەیەکی بەرچاو زیادی کردووە."
بەپێی ئامارێک کە وەزارەتی گەشتیاری و میراتە کولتوورییەکانی ئێران بڵاوی کردووەتەوە، پارێزگای لوڕستان بۆ یەکەم جار لە ریزبەندی ئەو 6 پارێزگایەیە کە زۆرترین گەشتیار سەردانیان کردووە.
پارێزگای لوڕستان خاوەنی 20 شوێنی گەشتیاری دیارە و ساڵانە گەشتیارێکی زۆر سەردانی دەکەن.
لە پشووی نەورۆزدا گەشتیارێکی زۆر لە ناوچە جیاوازەکانی ئێرانەوە سەردانی رۆژهەڵاتی کوردستان، بەتایبەتی شارە سنوورییەکان دەکەن.
لە شارە سنوورییەکانی رۆژهەڵاتی کوردستاندا بازاڕی فرۆشتنی کەلوپەلی بیانی هەیە و گەشتیاران کەلوپەلی نێوماڵ و جلوبەرگ لەو بازاڕانە دەکڕن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ