بافل تاڵەبانی: سەرکۆنەی ئەو تاوانانە دەکەین کە ئیسرائیل دەرهەق بە سەرکردەکان دەیکات

 

 

ئێوارەی رۆژی شەممە، 28ـی ئەیلوولی 2024، بافڵ جەلال تاڵەبانی، سەرۆکی یەكێتیی نیشتمانی کوردستان لە پەیامێکدا گوتی: "بەخەمێکی قووڵەوە، هەواڵی شەهیدکردنی سەماحەتی سەید حەسەن نەسروڵڵا، ئەمینداری گشتیی حیزبوڵڵای لوبنانیمان پێگەیشت."

 

بافڵ تاڵەبانی دەشڵێت: "لە کاتێکدا سەرەخۆشی لە خانەوادەی شەهید و گەلی لوبنان و موسڵمانان و هاوڕێیانی شەهید دەکەین بەهۆی ئەم کۆستە گەورەیەوە، داوا لە کۆمەڵگەی نێودەوڵەتی دەکەین کە رۆڵی یاسایی و مرۆیی خۆی بگێڕێت بۆ راگرتنی ئەم خوێنرشتن و دەستدرێژییانە بۆ سەر فەلەستین و لوبنان و ناوچەکە." 

 

سەرۆکی یەکێتی داوا لە هەموولایەنەکان دەکات "تا ئەوپەڕی دانبەخۆداگرتن ئارام بگرن تا ناوچەکە لە جەنگێکی فراوان بەدووربگیرێت." 

 

هەروەها دەشڵێت: "سەرکۆنەی ئەم کار و تاوانانە دەکەین کە ئیسرائیل دەرهەق بە هاووڵاتیانی مەدەنی و تیرۆرکردنی سەرکردەکان دەیانکات." 

 

سوپای ئیسرائیل بەیانیی ئەمڕۆ کوژرانی حەسەن نەسروڵڵا، ئەمینداری گشتیی حیزبوڵڵای لە هێرشێکی ئاسمانیدا راگەیاند، حیزبوڵڵای لوبنانیش دوانیوەڕۆی ئەمڕۆ هەواڵەکەی پشتڕاستکردەوە.