دەزگای ئاسایشی هەرێمی کوردستان: دوو سەرکردەی داعشمان دەستگیرکرد

 

 

بەپێی زانیارییەکانی دەزگای ئاسایشی ھەرێمی کوردستان، ئەو سەرکردە و چەکدارانەی داعش "لە هەوڵی خۆڕێکخستندا بوون بۆ تێکدانی ئارامیی هەرێمی کوردستان و ژیانی خەڵک و جێبەجێکردنی پیلانەکانیان"، هەروەها ئاماژە بەوەش کراوە "پیلانیان داناوە خۆیان رێکبخەن و ئامادە بکرێن بۆ چەند کردەوەیەکی تیرۆریستی لە سنووری پارێزگاکانی سلێمانی و هەڵەبجە".

 

بە بڕیار و سەرپەرشتیی سەرۆکی دەزگای ئاسایشی هەرێمی کوردستان، ئاسایشی سلێمانی لێکۆڵینەوەی دەستپێکردووە و دوای یەک مانگ "بەدواداچوونی ورد و دەستخستنی زانیاری و بەڵگە و دیاریکردنی شوێن و مانەوەی تیرۆریستان و چاودێریکردنیان، پاش رەزامەندیی دادوەری لێکۆڵینەوە بە بڕیاری سەرۆکی دەزگا، شەوی 28/27ی تەممووزی 2021 جووڵە بە هێزەکانی ئۆپەراسیۆنی ئاسایشی سلێمانی و ئاسایشی شارەزوور کرا و لە پارێزگای هەڵەبجە لە چوار ئۆپەراسیۆنی گەورە و هەڵمەتی هاوکاتدا هەر چوار تیرۆریست (ع. ح)، (ل. ج)، (ز. ح) و (ع. ح. ع) دەستگیرکران، کە دووانیان سەرکردەی داعش بوون و بەشداری و سەرپەرشتیی چەندین تاوانیان کردووە".

 

هەروەها ئەوەش خراوەتەڕوو، لە ئۆپەراسیۆنێکی دیکەدا لە سلێمانی، هێزەکانی ئاسایشی سلێمانی "تیرۆریست (س. ع)یان دەستگیرکرد".

 

لێکۆڵینەوە لەو کەیسە دەستیپێکردووە و دەرکەوتووە "تیرۆریستە دەستگیرکراوەکان" بەپێی ماددەی چواری تیرۆر داواکراو بوون و چەکداری داعش بوون لە "ویلایەتی باشوور و بەشداربوون لە چەندین تاوانی دژ بە مرۆڤایەتی و لە چەند شارێکی عێراق و هەرێم خۆیان رێکخستووە و مەرامیان بووە چەندین کردەوەی تیرۆریستی ئەنجام بدەن".

 

دەزگای ئاسایشی ھەرێمی کوردستان باسی لەوەش کردووە، لەبەر سەلامەتیی رێڕەوی لێکۆڵینەوەکان، زانیارییەکان هێڵدراونەتەوە و لە داهاتوودا لەو بارەیەوە وردەکاریی زیاتر بۆ رای گشتی دەخەنەڕوو.