رووداو دیجیتاڵ
زیاتر لە هەفتەیەکە کرێکار و کارمەندانی لقی کرماشانی کۆمپانیای ئێران خودرۆ مانیان گرتووە و داوای هاوتاکردنی مووچەکانیان لەگەڵ کارمەندانی لقی سەرەکیی کۆمپانیاکە دەکەن.
کارمەند و کرێکارانی ئەو لقە داوای هاوتاکردنی مووچەکانیان لەگەڵ کرێکار و کارمەندانی لقی سەرەکیی کۆمپانیاکە لە تاران دەکەن.
بە مەبەستی بەدواداچوون بۆ بابەتەکە، غوڵامڕەزا شەهبازی، قایمقامی شاری سەحنەی کرماشان رۆژی یەکشەممە لەگەڵ کارمەند و کرێکارانی ناڕازی کۆبوویەوە.
غوڵامڕەزا شەهبازی داوای لە کارمەند و کرێکارە ناڕازییەکان کرد "دان بەخۆیاندا بگرن و بگەڕێنەوە سەر کارەکانیان" و بەڵینی دا بەدواداچوونی پێویست بۆ داواکارییەکەیان بکات.
شەهبازی گوتی، "هەوڵ دەدەین بە زووترین کات کێشەکانی ئێران خودرۆی کرماشان چارەسەر بکەین و بەم زووانە مژدەی خۆشمان بۆیان دەبێت."
لقی کرماشانی ئێران خودرۆ رۆژی 25-07-2017 لە نزیک شاری سەحنە کرایەوە و نزیکەی 600 کەس کاری تێدا دەکەن. لە شەش مانگی سەرەتای ئەم ساڵی هەتاویدا نزیکەی 18 هەزار ئۆتۆمبێل لە کارگەدا بەرهەمهێندراون.
شاری سەحنە دەکەوێتە 55 کیلۆمەتری رۆژهەڵاتی کرماشان و ژمارەی دانیشتووانی زیاتر لە 70 هەزار کەسە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ