رووداو دیجیتاڵ
قایمقامی شاری خۆی لە باکووری پارێزگای ورمێ تابلۆیەک لە رێگەی سەرەکیی شارۆچکەی کۆتۆل لادەبات کە شارەوانیی شارۆچکەکە بۆ بەخێرهاتنی خەڵک بە زمانی کوردی داینابوو.
رۆژی (پێنجشەممە، 26-12-2024)، بە بڕیاری حوسێن عەباسی، قایمقامی شاری خۆی ئەو تابلۆیە لابرا کە رۆژی چوارشەممە لەلایەن شارەوانیی کۆتۆل داندرابوو و بە کوردی لەسەری نووسرابوو "بخێر هاتن باژارێ کۆتۆلێ". ئەو رستەیە بە رێنووسی کوردی لاتین و هەروەها فارسیش لەسەر تابلۆکە نووسرابوو.
تابلۆکە بە بڕیاری سولەیمان مامە، سەرۆکی شارەوانیی کۆتۆل داندرابوو. سولەیمان مامە، خەڵکی بۆکانە و رۆژی 12-02-2023، وەکو سەرۆکی شارەوانیی کۆتۆل دەستنیشان کرا.
بەپێی زانیارییەکانی تۆڕی میدیایی رووداو، لابردنی تابلۆکە ناڕەزایەتی خەڵکی کۆتۆلی لێکەوتووەتەوە و سەرۆکی شارەوانیی کۆتۆل بە کەسایەتی و چالاکڤانانی شارەکەی گوتووە، نووسین و دانانی تابلۆ لە دەسەڵاتی شارەوانی دایە و هەوڵدەدەن جارێکی دیکە تابلۆکە دابنێنەوە.
شارۆچکەی کۆتۆل دەکەوێتە ناوچەی کۆتۆل لە باکووری پارێزگای ورمێ و پێنج کیلۆمەتر لە سنووری باکووری کوردستان دوورە. کۆتۆل سەر بە شاری خۆیە. سەرجەم دانیشتووانەکەی کوردن، بەڵام بەشێک لە دانیشتووانی شارەکە ئازەریین
بەپێی سەرژمێری ساڵی 2016، شارۆچکەی کۆتۆل نزیکەی هەزار و 200 ماڵە و زیاتر لە پێنج هەزار دانیشتووی هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ