بەهۆی تۆپبارانی ئێرانەوە ژمارەیەک هاونیشتمانی لە سنووری سیدەکان شوێنەکانیان جێدەهێڵن

 

لە بەرزاییەکانی مێرکین شەڕ و پێکدادان لە نێوان سوپای پاسداران و لایەنێکی ئۆپۆزسیۆنی ئێرانی هەیە. ئیحسان چەلەبی، بەڕێوەبەری شارۆچکەی سیدەکان دەڵێت، تۆپبارانەکە "هەڕەمەکییانەیە" و خەڵکی سڤیل بەهۆیەوە دەبێتە قوربانی. 

 

خالید وەنەوشە، ئەندامی رێبەری و جێگری بەرپرسی ناوەندی پێشمەرگەی حیزبی دیموکراتی کوردستانی ئێران بە تۆڕی میدیایی رووداوی راگەیاند، هێزەکانی ئێران لە بنکە سەربازییەکانی سەر سنووریشەوە بە هاوەن ناوچە سنوورییەکانی باشووری کوردستان تۆپباران دەکەن.

 

جووتیارێک بە ناوی زانا سورچییەوە دەڵێت، "تۆپ بە نزیک ماڵەکانمان دەکەوت، ژن و منداڵ زیرەیان کردبوو ناچارین بڕۆین و چارەیێکی دیکەمان نییە".

 

عارف کارەسوڵ، مەڕدارێکە و دەڵێت، "لە دوێنێوە تۆپ وەک باران بەسەرماندا دەبارێت، وەڵڵا تا بەڕێ کەوتووم نزیک 50 تۆپ بە دەوروپشتم کەتووە."

 

لە بەشێک لە بەرزاییەکانی سنووری ناحیەی سیدەکان دەنگی تۆپ زەوی دەهەژێنێت، دەنگی چەکی سووک و مامناوەند دەبیسترێت، بە گوتەی کاسبکارانی ناوچەکە لە گەرووی مێرکین کە دوایین خاڵی نێوان باشوور و رۆژهەڵاتی کوردستانە شەڕ و پێکدادان لە نێوان

سوپای پاسداران و لایەنێکی ئۆپۆزسیۆنی ئێرانی هەیە.

 

هەرسێ گوندەکانی رەشکین، دەرهۆڵ و بن پەرێزە لە نزیک بۆردوومانەکەن.

 

ئیحسان چەلەبی، بەڕێوەبەری ناحیەی سیدەکان دەڵێت، "وای لێهاتووە خەڵکی بەناچاری شوێنەکانیان چۆڵ بکەن.. زۆر بەداخەوە زۆر خوارتر ئەو ناوچانە بۆردوومانکراوە بەبیانووی بوونی حیزبەکانی رۆژهەڵات و تۆپبارانەکە بە شێوەیێکی هەڕەمەکییانەیە، خەڵک زەرەرمەند دەبن بەداخەوە بووەتە هۆی پەککەوتنی کەرتی پەروەردە و

قوتابخانەی رەشکین داخرا کە ژمارەیێکی زۆری قوتابی تێیدا دەیخوێند."

 

تاوەکو ئێستا تۆپبارانەکە زیانی گیانی نەبووە، بەڵام ئەو رووبەرەی ئێستا بەهۆی ئاگر و ئاسنی ئێران رەش هەڵگەڕاون زیاتر لە سەد ماڵە جووتیار و مەڕداری تێدا نیشتەجێ بوون.