دووکاندارێک لە سۆران: 22 ساڵە بێبازاڕیی لەوە خراپترم نەبینیوە

 

عامر قادر، دووکاندار لە سۆران بە رووداوی گوت "لەراستیدا هەتاوەکو ئێستا بارودۆخی لەوە سەختتر و بێ بازاڕی لەوە خراپترم نەبینیوە. بە راستی کاریگەریی وای کردووەتە سەرمان، کە خۆزگە بخوازم دەستبەرداری ئەو کارەبم، چونکە بێ بازاڕی گەیشتە سەر ئێسقانمان."

 

ئەم دۆخی بێ بازاڕی و کەمی فرۆشە بۆ بازاڕی سۆران و سنوورەکە وەک یەکە. زۆریی ژمارەی مووچەخۆرانی ئەو دەڤەرە، نادڵنیایی لەکاتی دابەشکردنی مووچە و دواکەوتنی، لە دیاترین ئەو پاڵنەرانەن کە وایانکردووە ئەو خەڵکەی روودەکەنە بازاڕ، زیاتر تەماشاکەر بن نەوەک کڕیار.

 

محەمد برایم، هاونیشتیمانییەکی سۆرانە و دەڵێ "چۆن بە دڵی خۆم بکەم، کە شەش مانگە یەک مووچەم وەرگرتووە، لەوانەیە من دوو ملیۆنی ئەو کەسە قەزدار بم، ئەوە سبەی مووچەم بۆ هات چی لێ بکەم و بە چی بدەم."

 

هاونیشتمانییەکی دیکە بەناوی جەمال حەمەد دەڵێ "زۆربەی زۆری خەڵکی ئێرە مووچەخۆرن، کە مووچەش نەبێت، هیچ داهات و سەرچاوەیەکی دیکەیان نییە پشتی پێ ببەستن و لە بازاڕ بەکاریبهێنن."

 

رۆژانە تەنها دوو کاژێر پێش بانگی ئێوارەم بازاڕی سۆران قەرەباڵخ دەبێت، ئەوانەی لەو کاتەدا بازاڕ بەجوڵە دەخەن، بە داراییەکی کەم و سنووردارەوە دێن و پێویستییەکانیان شتی بچوکن، زۆرترین خەرجییان لە پێنج هەزار دینار تێپەڕ ناکات.