رووداو دیجیتاڵ
قایمقامی هەولێر دەڵێت، لە پلانیاندایە دەست بە کۆکردنەوەی سەگی بێلانە بکەن، بۆ ئەو مەبەستەش شوێنێکی گەورە دیاریکراوە و چاوەڕوانن زیاتر لە 400 ملیۆن دیناریان بۆ خەرجبکرێت بۆئەوەی دەست بە جێبەجێکردنی پڕۆژەکە بکەن.
نەبەز عەبدولحەمید، قایمقامی هەولێر رۆژی دووشەممە 21-11-2022 بە تۆڕی میدیایی رووداوی راگەیاند، دەیانەوێت بە شێوەیەکی زانستیانە و لە چوارچێوەی رێکارەکانیان بۆ پاراستنی مافی ئاژەڵان، چارەسەرێك بۆ کێشەی سەگی بێلانە بدۆزنەوە تاوەکو مەترسییان لەسەر هاونیشتمانیان کەمبکرێتەوە و دەشڵێت، بۆ ئەوەش هەنگاوی پێویست نراوە.
قایمقامی هەولێر ئەوەی خستەڕوو، لە هەولێر شوێنێک هەیە بۆ کۆکردنەوەی سەگی بێلانە، بەڵام بچووکە؛ بۆیە بڕیاری دروستکردنی شەڵتەرێکی گەورە دراوە و بۆ ئەوەش شوێن دیاریکراوە و گوتیشی، ئەوەی ماوە ئەو بودجەیە کە پێویستە دابینبکرێت بۆئەوەی دەست بە پڕۆژەکە بکەن.
بە گوتەی نەبەز عەبدولحەمید، ئەوان پێویستیان بە زیاتر لە 400 ملیۆن دینارە بۆئەوەی دەست بە دروستکردن و تەواوکردنی ئەو شەڵتەرە بکەن، "چاوەڕوانیشین و کەی بودجەکە دابینکرا دەست بە کارەکە دەکەین."
بەپێی ئامارە نافەرمییەکان، تەنیا لە هەولێر نزیکەی 20 هەزار سەگی بێلانە هەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ